LADC-ah BJP kaihhruai sawrkar thar a ding dawn

BJP Mizoram chuan Lai Autonomous District Council (LADC)-ah BJP kaihhruai sawrkar thar siam a ni tur chu lawmawm an tih thu an sawi. Nimin khan Aijal Club-ah LADC-a sawrkar thar siam chungchang ah hian BJP leh MNF hruaitute chu an thukhawm a, LADC-ah hian ZPM chhuahsana BJP a lut ta MDC pahnih (2) te leh MNF MDC 11 ten Sawrkarna an siam dawn a. “Congress MDC pakhat in pawnlam atanga a thlawp dawn avangin LADC-ah hian Joint Legislature, BJP Led Government Sawrkar tha tak mipui Sawrkar siam a ni dawn a ni,” an ti. Joint Legislature Party hian ZPM chhuahsana BJP zawmtu, M. Kawnpui Bialtu MDC N. Zangura chu Legislature Party Leader-ah thlangin nimin khan Larsap hnenah sawrkar an siam theih thu an thlen a ni.