Serchhip District-ah SCC ten Sawhthing lei dawn

Serchhip District-a Sawhthing lei leh dan tur chungchang chu nimin khan sawiho niin SCC ten ruahmanna siamin Sawhthing hi an lei dawn a ni.
Nimin khan Serchhip DC Meeting Hall-ah Serchhip District Agriculture Marketing Committee (DAMC) chu an Chairman leh District Bawrhsap Paul L. Khuma hova thukhawmin Sawrkarin kuthnathawktute Sawhthing thar-chhuah a lei sak leh tawh dawn avangin ruahmanna siam a ni a. Tun tumah hian sawrkar chuan Secondary Collection Centre (SCC) te tan an lei theih zat qouta bituk lovin SCC tina khaw hrang hrang ten tharchhuah an beisei zat (expected yield) atang te, an chawh sa atang te leh SCC Kudam-a Sawhthing dah theih zat atangte a chhutin, Primary Collection Centre (PCC) te nen inberawnin SCC te hian Sawhthing lei zat tur ruahmanna an siam tawh dawn a. SCC te hian auction notice chhuahin, a leitu tur zawn kawngah pawh hma an la anga; DAMC lam pawhin hralhna zawn kawngah tanpuiin. Support Price an dawn theihna turin SCC te hian DAMC hriatpuina in an hralhchhuak thin ang. 

Serchhip District chhunga SCC pakhat, Lungpho SCC chu a panna kawng a that tawk loh avangin Lungpho SCC huam-chhunga khuate chu Chhiahtlang SCC-ah beh tir nise tiin a rel a. Sawrkar in Sawhthing a lei hmasak ah pawh khan hralhchhuah leh kawngah Lungpho SCC hian harsatna a lo tawk tawh nia thudawn a ni.

SCC te hi Bank Account hawng theuh tura beisei an nih laiin RBI inkaihhruaina danin Society Registration number nei lo te chu Scheduled Bank-ah account hawn a remti lo a. Hemi chinfelna tur hian DAMC chuan Commitment Letter a siam sak anga, District Cooperation Office chuan dan hnuaiah a rang thei ang bera registration tih fel sak turin hma an la dawn a ni.