Sector Headquarters-ah hmang chhunzawm dawn

Assam Rifles Director General Lt. Gen. Vikas Lakhera chuan Zokhawsang-ah an awmna sawn tawh mahse Khatla Aizawl-a an hmun chu Sector Headquarters-ah hman chhunzawm a la ni dawn tih a sawi.

DD News palaiin a kawmnaah Lt. Gen. Vikas Lakhera chuan sawrkar laipuiin Lammual-a an hmun chu Mizoram sawrkar hnena hlanchhawng tura thutlukna an siam avangin an awmna hmun chu sawn an nih thu a sawi a, Zokhawsang chu Aizawl atanga hmun hla lote, KM 12 leka hla, hmun mawi tak a nih thu a sawi bawk. Aizawl-a awm thin Assam Rifles Battalion-te kha Jammu and Kashmir-ah sawn niin anmahni thlaktu turte'n April thla tawp hian Mizoram an rawn thleng dawn niin DD News palai chuan thu a dawng a ni.

Zokhawsang-a Assam Rifles hmun hi kum 2009 khan buatsaih a ni tawh a, ZPM in sawrkarna an chan hnu October 2024 khan Prime Minister Narendra Modi, Union Home Minister Amit Shah, Union Defence Minister Rajnath Singh, Chief of Army Staff, leh Assam Rifles mi pawimawhte nen inbiakna neih a nih hnuah an insawn tur hi tihchian a ni chauh a, March ni 15, 2025 khan Union Home Minister Amit Shah chuan Zokhawsang-a Assam Rifles hmun thar hi hawngin, hmarchhak mipuite nena inrem taka awmna tur leh hmasawnna tluantling a awm theihna tura hmalakna a nih bakah, Prime Minister Narendra Modi kaihhruai sawrkarin Mizoram mipuite duhdan a ngaihpawimawh zia lantirna a nih thu a sawi a ni.