Sawrkar-ah JCB 2 hlan, pakhat Serchhip tan

Toyota Kirloskar Motor Private Limited te chuan Road Safety & Disaster Management lama hman atana Mizoram sawrkar hnena JCB pahnih an pe a, heng zinga pakhat hi Serchhip District-ah dah tura ruahman a ni.
Heng JCB pahnih te Chabi hi nimin khan Chief Minister Pisa Tual-ah Chief Minister chu hlan niin hemi hnu hian CM Conference Hall-ah hun hman zui a ni a, he hunah hian Chief Minister Lalduhoma chuan Disaster Management lama hman theih hmanraw to tham, tangkai bawk si kan neih belh chu an lawm thu leh a tangkai hle dawn nia a hriat thu a sawi a. Toyota Kirloskar Company-in Aizawl Traffic Management tihchangtlunna tura an thilpek te, Chapchar Kut senso tam tham tak an thawh te leh Mizoram tana an luanchhuahna dangte pawh a chhuangin lawmawm a tih thu a sawi bawk.

He hunah hian Vikram Gulati, Executive Vice President and Country Head pawhin Mizoram in leilung chhiatna a tawh thin thu te an hre thin tih sawiin, “Tih theih tam tak nei lo mah ila, heng chhiatna a lo thlen palh changa chhanchhuahna leh tanpuina hnathawhna lama hman tur, an tha tichaktu tura kan rin JCB hi sawrkar pek tha kan ti a. Lawm takin kan hlan a ni,” a ti a. Hemi hnu hian JCB pahnih inhlan tura inremna, Memorandum of Agreement chu Chief Minister hnenah hian a hlan nghal a ni.

Nimin-a hlan tak JCB hi Aizawl leh Serchhip District-a Disaster Management Authority te kutah dah tura ruahman a ni a, Serchhip District atangin Bawrhsap Paul L. Khuma pawh he hunah hian telin thu a sawi bawk a ni.