Poshan Pakhwada kharna leh VC Training neih a ni

Nimin khan Serchhip-ah Poshan Pakhwada 2025 kharna leh Village Council te tana Poshan Panchayat chungchanga hriat tur pawimawh in-zirtirna neih a ni.
Serchhip CDPO Conference Hall-a he hun hman hi Serchhip ICDS Project Office-a thawk, Calvin Lalngaisanga chuan kaihruaiin he hun hmanpuitu Serchhip CDPO Caryll Lalpari chuan Poshan Pakhwada an hman thin chhan leh September thla a Rashtriya Poshan Maah an hman thin dan te sawiin, nu in nau an pai lai atanga nau an hrin hnu thlenga chawtha ei a pawimawhna te a sawi a. Kumin a Poshan Pakhwada an hman hi April 8 atanga hman niin chawlhkar hnih chhunga hun an hman ah hian insawrbingna kawng chi li an nei tih a sawi a, chung zingah chuan nu in nau a lo pai tan atanga a naute hrina kum 2 a tlin thleng, ni 1000 chhunga nu leh a naupai in enkawlna tha an dawn theihna tura inzirtir chu thil pawimawh tak a nih thu leh hei hian naupang lo thanlen zelna turah nghawng pawimawh tak a neih dan te a sawi bawk a. Naupang chu tui an tih zawng ngawt ni lovin, an taksa thanlenna atana chawtha pek thin a pawimawh thu te pawh a sawi bawk.

Nimin-a he hun hman ah hian Serchhip-a Anganwadi Workers te leh Serchhip khawpui chhunga VC hrang hranga Hmeichhia thlantlin te tel tura sawm niin Poshan Coordinator Lalnundiki chuan Poshan Panchayat chungchang zirtirin VC area tin-a din a tulna leh an hnathawh dan turte a tarlang a, Poshan Panchayat-ah hian Chairman atan VC atana thlantlin Hmeichhia te hman tur a nih thu leh Secretary atan Anganwadi Workers te hman tur a nih thu sawiin, Member mi 10-15 awm tur a nih thu te a sawi bawk a ni.