MNF kan sang leh tulh tulh - MNF President

MNF President Zoramthanga chuan ZPM sawrkar chu a ni telin an tlahniam tulh tulh nia sawiin, “MNF kan sang leh tulh tulh thung,” a ti.

MNF Party hian nimin khan Kolasib District chhunga MNF VC tling tharte lawmpuina hun chu Kolasib Diakkawn YMA Hall-ah an buatsaih a, he hunah hian MNF President Zoramthanga chuan MNF VC zawng zawngte chu Pathian tihna nen theihtawp chhuaha khawtlang rawngbawl turin a chah a. Sawrkar lai ZPM chungchang sawiin, “ZPM hi itawm chitin rengin an inzuar a. Bang lehlama nula aw mawi tak, amah kan la hmuhchian loh kha nupui-ah Zoram mipuiin kan nei ta a. Kan han vote ta ruih ruih a, kan vote tling ta a. Thil kha an sawi awl bawk a, D-A-H DAH atangin an tan a, tunah chuan an sawi loh ang hlirin an awm ta a. An sawi angin an awm lo a ni. Kum khat chuang an sawrkar chhung hian sawrkar hnathawkah a ni telin an tlahniam zel a, sawrkar hnathawk lian an nuih a za a, ‘naupang inkhuallem kan ang’ an ti,” a ti.

MNF President chuan ZPM sawrkar chu a ni telin an tlahniam tulh tulh nia sawiin, “MNF kan sang leh tulh tulh thung. MNF nge nge kha an lo rintlak a, mipuiin kan lo chhawr a ni, an ti tan leh mek. ZPM hi an kal rei deuh hunah phei chuan an hmabak a nasa lo khawp ang. Mipui in ZPM kan hrechiang sawt khawp mai,” a ti bawk.

Nimin-a he hun hman ah hian Kolasib District chhunga MNF VC tling thar mi 92 hnenah lawmpuina thuziak hlan an ni.