Mizoram-a International Half Marathon buatsaih turin hmasawnna a thlentir an beisei tih sawi

Sports Minister Lalnghinglova Hmar chuan Mizoram-a International Half Marathon buatsaih tur in Mizo thalaite zingah infiamna kawnga hmasawnna a thlen tir dawn tih sawiin, Tourism lamah hmasawnna a thlen theih an beisei tih a sawi bawk.

Tunkar Inrinni-a Mizoram-a ‘International Half Marathon’a buatsaih tur chungchanga chanchinbumite a kawmna ah he thu hi sawiin Sports & Youth Services Department changtu Minister Lalnghinglova Hmar chuan, an tum ber chu Marathon Map-ah Mizoram a tel ve theihna tur a ni tih a sawi a, Marathon buatsaih chu hautak deuh mah se Mizoram tan kawng tam takah hmasawnna a thlen dawn tih sawiin, thalaite ah hmasawnna tam tak a thlen beisei a nih thu a sawi a, an tum anga a hlawhtling thei anih chuan nakin zelah Mizoram tan Mellung pawimawh tak a ni dawn tih a sawi bawk.

Sports Minister chuan Marathon an neih tur chu Athletic Federation of India hriatpui intlansiak a nih thu pawh thuthar thehdarhtute hnenah hian sawiin, hetah hian Athletic Federation of India ten an rawn endik dawn thu leh an tlan chak chuan record te pawh siam theih a ni dawn tih a sawi bawk.

Mizoram sawrkar Sports & Youth Services Department, Athletic Federation of India leh Innovations India Pvt. Ltd. tangkawp buatsaih International Half Marathon hi April ni 26, 2025 (Inrinni) hian Aizawl-a Rajiv Gandhi Stadium-ah buatsaih a ni dawn a, Intihsiakna hi hlawm thum a then a ni a, Half Marathon, Open Race leh Fun Race niin Intihsiakna hlawm tinah hian mipa leh hmeichhe tan lawmman tha tak tak siam a ni a, cheng nuai 10 semchhuah a ni dawn a ni.

Intihsiakna tur Half Marathon hi km 21.097-a thui niin Open Race hi km 10 a thui a nih bakah Fun Race hi km 5 a thui a ni a. Intihsiakna hlawm thum bakah hian naupang kum 10-15 inkar te tan ‘Junior Race’ chu km 5 a thui buatsaih a ni bawk ang.

He intihsiakna neih tura tel tum inziaklut duh te tan website - www.aihm2025.com ah emaw, Millenium Centre kawt-ah offline registration kalpui mek a ni a. India khua leh tui tan Rs. 799 chawiin a inziahluh theih a, ramdang mi tan dollar 30 chawi a ngai thung a ni. College leh sikul zirlai te chu an student ID hmangin Rs. 99 chauh chawiin an inziaklut thei bawk anga. He intihsiaknaa tel duh te tan Vawiin (April ni 24, zanlai dar 12:00) thleng hian inziahluhna hun hawn a la ni.

Half Marathon (21.1km) darkar thum chhunga thleng te tan Finishers Medal sem chhuah tur a ni dawn a, thlan thleng zawng zawng te hian ni 21 chhungin inziahluhna website atangin Certificate an download thei dawn bawk a ni.