Mizoram-ah Sawhthing lei leh tan niin kumin ah quintal 72,460 lei a ni tawh

Mizoram sawrkar chuan nimin atangin a thawh hnihna atan Kuthnathawktute tharchhuah Sawhthing a lei tan a, kumin February 20-a Sawrkar in Sawhthing a lei atang khan Mizoram pumah loneitu mi 8820 te Sawhthing thar chhuah quintal 72,460 lei sak an ni tawh nia chhinchhiah a ni.
Mizoram Agricultural Marketing Board (MAMB) Managing Director, Lalhmingmuana chuan Akashvani zawhna chhangin, nimin atanga a thawh hnihna atana Sawhthing an lei dan chu a thawh khatna nen a inang lo tih sawiin, a thawh hnihna an kalpui tur chu ruahmanna awmze nei zawka kalpui an tum tawh thu a sawi a, Mizoram pumah Sawhthing dahna tur, Secondary Collection Centre (SCC) 62 an siam tih sawiin, heng atang hian vawi leh khata an lei huk tawh dawn lova, Sawhthing lei thawhkhatna a an la lei ve lohna khua te an ngaipawimawh dawn tih a sawi a ni. 

MAMB Managing Director chuan Marketing Board chuan Mizoram sawrkar sum tam tak hum zawnga Sawhthing lei an tum tih sawiin, tun dinhmunah Sawhthing leikhawm sa te chu man to zawka hralh vek an tum thu a sawi a. Tun dinhmunah India-ah Sawhthing man a san loh avangin Mizoram chu hmun hla leh kalpawh harsa a nih avangin Sawhthing lei tur ten an pan hnuhnun ber a nih thin avangin Sawhthing man chu a sang thei lo tih a sawi bawk.

MAMB Managing Director chuan Lal-hmingmuana chuan kumin February ni 20 atanga nimin thlengin Mizoram pumah loneitu mi 8820 te Sawhthing tharchhuah quintal 72,460 lei sak tawh anga chhinchhiah a ni tih pawh sawiin, a thawh hnihnaah hian Sawhthing quintal nuai 2 dawn lei hmabak an la nei nia an hriat thu a sawi bawk.

Hetihlai hian Serchhip District-a chuan nimin khan Sawhthing hi lei tan ala ni lo nia thu-dawn a ni thung a, DC lama thawktute chuan Sawhthing lilam kalpui anih hnuah leitu tur an hmu tawh tih sawiin, an lei theih tur zat erawh hriat ala ni lo tih an sawi a. Vawiin lam hian Bawrhsap hova thutkhawm neiin Sawhthing lei dan tur hi tihchiah a nih a rinawm nia thudawn a ni bawk.