Mizo nu hnenah kuthnathawktu tha chawimawina hlan

Ramchhunga kuthnathawk tithate leh midang te entawnna tura hmala te chawimawina chu kumin hian Saikhamakawn khuaa Lalrinpuii hnenah hlan a ni.

Lalrinpuii’n chawimawina, Aspee L.M Patel Farmer of the Year Award a dawn theihna chhan hi chuktuah huan tha taka a enkawl avang leh kutkawih eizawnna hmanga midangte zirtirna leh hmalak dan tur ngaihtuah sak vang a ni a, Farmer of the Year Award hi huang thum-ah then niin Lalrinpuii hian ‘Woman Farmer Category-2022’ ah ‘An Enterprising Woman Farmer in Vegetable Cultivation from North East Region’ lawmman a dawng a, chawimawina hi Lok Sabha MP Shashank Mani Tripathi-a’n a hlan a ni.

Lalrinpuii hian kum 2018 atangin Horticulture Department hnuaiah training neiin, Off-Season Tomato a ching tan a, chuta tang chuan hlawhtling chho zelin lawmman chi hrang hrang - Best State Farmer Award 2020-21, Best Horticulture Farmer Award (Aizawl District) 2022, District Millionaire Farmer of India Award 2023 te hi a lo dawng tawh a, tun tuma he Award dawng tur hian Horticulture Deparment in hmalak puiin an nominate a. Award dawng tur hi India ram puma kuthnathawk tithate atanga thlan thin a ni a. Uluk taka endik niin, Preliminary Stage zawhah Nomination Scrutiny paltlang lehin Mumbai atangin a hmun ngeiah anmahni rawn kalin kawng hrang hranga a hmalak dante enfiah a ni a, hemi hnu hian Committee vawili paltlang lehin Award dawng thei tur hian thlan a ni ta a ni. He Award hi Aspee Agricultural Research and Development Foundation, Mumbai in kumtin a hlan thin a, tun tum hi Covid-19 hnua an sem leh hmasak ber a ni.