Minister in lungawi lohna lantir mak a tih thu a sawi

School Education Minister Dr. Vanlalthlana chuan Mizoram Govt. School Teacher’s Union (MIGOTSU) ten lungawi lohna an lantir mek chu mak a tih thu a sawi.

Nimin khan ZPM Party chuan Aizawl-a an Office-ah Chhung Inkhawm neiin he hunah hian Minister Dr. Vanlalthlana chuan sawrkar hmasa khan an term tawp dawn lamah tlanchhe chungin School 180 lai sawrkar School-ah a puang nia sawiin, “Dan behchhan tur awm miah lovin School 52 chu Provisional Adhoc-ah hlankai an ni a, Lumpsum School awmsa leh a thar an puan hi 108 lai a ni bawk. Upgradation atana School an chhawpchhuah thenkhat chu naupang pawh nei lo te, building pawh nei lo te, thenkhat awm tawh lo (defunct) tawh te leh khawtlang enkawl pawh ni lo, Private School te an lo awm a, MLA Election awm tur thlir chunga an tih a nih avang khan a phuai luai hle a ni,” a ti a. Tunah hian Mizoram Govt. School Teacher’s Union (MIGOTSU) ten Bagde dum belin Sawrkarah lungawilohna an lantir mek tih sawiin, “Education Department in theihtawp chhuaha an tana hma kan laknate ngaihtuah chuan an lungawi zo lo hi mak kan ti hle a ni. Dan awmsa in School upgrade tura a huam loh te pawh an tel theihna turin Dan kan siam belh mek a, an tana hma kan lakna hi ngaichang thiam sela kan duh hle a ni,” a ti.

College lamah pawh Siaha, Lawngtlai leh Kalmanagar College te an indaih lo viau emaw an tih laiin Aizawl-a College te pawh an lo indaih lo hle tih H&TE Minister chuan sawiin, “MPSC kaltlangin Lecturer 30 direct a lak kan tum mek a ni,” a ti a. Mizoram Polytechnic Lunglei chu kum 2021-ah sawrkarin a khin let loh avangin a khingtuten thiam an chan thu leh kum 2022-ah Court in cheng nuai 98 ram luah man pe tura sawrkar a hriattir leh thu sawii,, “Chu pawh khinlet lohvin a awm a ni. Kan sawrkar ve leh khan High Court-ah appeal kan tum a, appeal hun a lo pel tawh a. Tunah hian Supreme Court-ah kan dil leh mek a ni. Sawrkar hmasate khan thil tha tamtak an lo ti chung khan a lera lan mawi ringawt kha an thupui niin a lang a, RUSA hnuaia School an lo sak te pawh kum reilote ah thawmthat a ngai leh nghal der tawh a ni,” a ti.

Minister Dr. Vanlalthlana chuan sawrkarna an chan tirh khan India ram pumpuia zirna tehkhawngah Mizoram chu State leh UT 36 zingah a hniam ber dawttu kan ni tih pawh sawiin, “Tehkhawng hi Performance Index 2.0 hmanga kalpui niin, National Achievement Survey (NAS) hnuaiah uluk taka Zirlaite dinhmun zirchian a ni a, kan dinhmun hi a chhuanawm loh hle a ni,” a ti a. Tunah hian Zirtirtu semrual nan Transfer Rules an buaipui mek thu leh an hrualmum thei tep tawh tih a sawi a, School siam that leh sak that hna te, zirtirtu dinhmunte mipui hmuh theih turin vskmizoram.com ah entheihin an phochhuak mek tih sawiin, mipuite pawhin lo ngaihven se an duh thu a sawi bawk.