MAL dincham lawmin Book of the Year hlanna neih a ni

Mizo Academy of Letters (MAL) chuan nimin khan an dinchampha lawmin 'Book of the Year 2024' lawmman chu 'Hun inher kara Zofate' tih ziaktu F. Vanlalrochana hnenah a hlan bawk.

I&PR Auditorium, Aizawl-a he hun hman hi Supply Minister B. Lalchhanzova chuan hmanpuiin ziak mite chu hnam rohlu an nih thu leh ram leh hnam tana thuziak tha tak tak hnutchhiah turin a fuih a. Lehkhabua ziak mai piah lamah ngaih-thlak theih tur zawnga an thuziak te pawh phochhuak turin ziak mite chu a chah a. MAL Diamond Jubilee (1964-2024) Souvenir 'Mizo Thu leh Hla Zin Kawng' tih phek 467-a chhah chu a tlangzarh nghal bawk.

He hun hi MAL President Prof. RL Thanmawia chuan kaihruaiin Khual zahawm leh adviser to Chief Minister Lalmuanpuia Punte chuan MAL Life member thar mi 40 te hnenah Certificate a hlan bawk.

Nimin-a he hun hman ah hian kum 2024 chhunga lehkhabu chhuak tha ber, 'Book of the year 2024' chawimawina chu 'Hun inher kara Zofate' tih ziaktu F. Vanlalrochana hnenah hlan a ni a, Book of the Year 2024 Committee Secretary H. Lalawmpuia chuan kum 2024 chhungin Mizo tawnga lehkhabu ziak 215 an lakkhawm theih thu a sawi a. Heng lehkhabu atang hian a tha ber hi thlanchhuah a ni tih a sawi a. MAL hian kumtin an pawl dincham, William Shakespeare-a pianchampha. April ni 23-ah Book of the Year lawmman hi an hlan thin a. Kumin hi Book of the year 36 thlanna niin mi 30 in an dawng tawh a. Mi panga - B. Lalthangliana, C. Laizawna, Lalhriata, C. Lalnunchanga leh Lalhruaitluanga Chawngte te chuan tum hnih an dawng tawh a. Hmeichhia zingah Lalsangzuali Sailo, H. Lalngurliani, Romuanpuii Zadeng, Zohmangaihi leh Ahmangaihi Khiangte ten an dawng tawh bawk.