Larsap-in Agriculture leh Horticulture hotute a kawm

Mizoram Larsap General Vijay Kumar Singh chuan nimin khan Mizoram Sawrkar hnuaia Agriculture leh Horticulture Department hotute chu Raj Bhavan-ah kawmin Sustainable Agriculture a awm theih nana pawimawh leh Department pahnihte hmalakna a sawipui.

He inkawmna ah hian Larsap General Vijay Kumar Singh (Retd) chuan Sustainable Agriculture nei tura hmalak a tul thu sawiin, hmalakna tlo leh tluantling, thing leh mau tichereu lo leh leilung tichhe lo thei ang bera eizawnna kalpui a tul thu a sawi a, hei hi tun mai nilo nakin hun thlenga pawimawh a ni tih sawiin, Fertilizer tel lo thlai tharchhuah kawngah tanlak nasat a tul thu a sawi a, Organic thlai a ni ngei a ni tih finfiahna hmun, Laboratory leh standard tha tak State puala neih a tul thu a sawi bawk.

Hei bakah hian Larsap chuan loneitute'n hlawkna tam zawk an dawn theih nan Supply Chain mumal tak, a kara midang inzep leh hlawkna tam zawk hlep thin an awm loh nana ruahman a pawimawh thu a sawi a. Thlai thar sawngbawlna leh thil hlu zawk a chantir kawnga tanlak thar a pawimawh thu pawh sawiin, Department pahnih hotute chu Central leh State chhunga Line Department dangte nena inrawna ruahmanna tha zawk ngaihtuah zel turin a chah a ni.

He hunah hian Agriculture & Horticultulure Department -a Special Secretary Ramdinliani chuan Mizoram pum zau zawng (geographical area) za zela 10 chu Agriculture leh Horticulture hnuaia hmalakna a nih thu a sawi a. Department hnuaia Scheme leh Project hrang hrang kalpui mekte tarlangin, tlangram loneih kum tina thlak thin bansan tura hmalak dante a sawifiah a ni.

He hunah hian Agriculture Department leh Horticulture Department hnuaia Scheme hrang hrang hnuaia hmalakte thlirho a ni a. Organic State ni thei tura pawimawhte sawiho niin, thlai hrisel tam zawk thar kawnga hmalak tulte bakah a sawngbawlna kawnga tanlak ngaihna laite sawiho a ni a. Organic Certification nei tur leh a nei tawhte tinung thar leh tura senso ngai tam thin lutuk sutkian nan State Certification Body neih a tul thu te, Sawrkar laipui duhdan anga Cluster Based Farming leh lei titha leh tura hamlaknate sawiho a ni a. Sawhthing sawngbawlna tur Integrated Processing Unit 2 din tura hmalak mek a nih thute, a channa (slicer) 22 leh phorona (solar dryer) 22 ve ve nei tura hmalak a nih thu tarlan a ni a. Tun dinhmunah Mizoramah organic certified area 8,000 Hectare a awm mek thu leh 5,500 Hectare dang pawh ruahman mek a nih thu he hunah hian tarlan a ni bawk. He inkawmna ah hian Agriculture Director R. Lalnunzira leh Horticulture Director CH Lalmuanpuia bakah Department pahnih Senior Officer-te an tel a ni.