Furpui lo thleng turah mipuite fimkhur turin chah

Serchhip District Bawrhsap chuan Furpui lo thleng turah mipuite chu fimkhur tura chahin, inkaihhruaina te a tichhuak.
Hemi chungchanga thuchhuah a siamah District Disaster Management Authority Chairman leh Bawrhsap Paul L. Khuma chuan Furpui a lo thleng leh dawn ta tih tarlangin, Mizoram hmun hrang hrangah ruahsur, Khawipui ri, Tek tla leh Thli thawk thei dinhmun ah kan ding leh ta tih a tarlang a. Hei vang hian Serchhip District mipuite chu fimkhur tura chahin, Mahni In leh lo te thli leh ruah a dawl theih nan a tul anga thawmthat ngai laite thawmthat tur a nih thu te; Tui paihna leh tuiluan kawr te tha taka siam tur a nih thu te; Ruahsur avanga leimin thei laite hriatchiana fimkhur tur a nih thu te; Tui hmun, lui leh ramhnuai ah te ruahsur nasat leh Tek tlak laiin kal loh a that thu te, Ruah vanga eng (power supply) neih loh theih a nih avangin Electric hmang thil te a charge lawk theih apiang charge lawk a that thu leh Rikrum thila mamawh tur Torch Light, Emergency light, First aid kit, tui thianghlim leh eitur te lo inrin lawk a that thu te a tarlang a. Tek tla lakah kan him zawk nan Khawpui ri a lo awm a, Tek tlak laiin Thingkung leh Electric ban hnaihah te awm loh tur a ni tih te a tarlang bawk.

Chhiatna a lo thlenin Serchhip District Emergency Operation Centre chu engtik lai pawhin biak theih reng a nih thu pawh tarlangin, Ph. No. 9862116104/8119978919, 1077-Toll Free-ah te biak theih a nih thu a tarlang a. Serchhip District chu Zone hrang 10-ah thenin, heng ah te hian Zonal Officer ruat theuh an nih thu te pawh a tarlang bawk a ni.