Finance Department in MUHCS atan sawrkar hnathawk te Family Declaration thehluh turin hriattir

Mizoram sawrkar Finance Department chuan sawrkar hnathawk te chu April thla chhungin Mizoram Universal Health Care Scheme (MUHCS) atan Family Declaration thehluh turin a hriattir.

Finance Department hian April 1, 2025-a hman tan Mizoram Universal Health Care Scheme (MUHCS) chungchangah hriat fiah tâwk lo awm thei a nih avangin sawrkar hnathawk (a nghet)-te tana hriattur a tarlang a; MUHCS chu aworkar hnathawkte'n zawm ngei tur a nih thu tarlangin, “April 2025 chhungin Controlling Officer hnenah form duan sa hmangin Family Declaration thehluh tur a ni. Chhungkaw pakhatah sawrkar hnathawk pakhat aia tam pawh awm se an Contribute (pawisa thawh) vek a ngai. Sawrkar hnathawk regular-te tan an dependent family member-te hi CS(MA) Rules, 1944 zûla kalpui a ni,” an ti.

Finance Department tarlan danin, Dependent Family Member-in a huam loh chhungkaw member dangte chu Scheme hnuaiah kêp theih an ni lo a; Scheme hamthatna dawng ve thei tur chuan a hranpain mipui náwlpui anga an inziahluh ve a ngai a ni. MUHCS chu sawrkar hnathawkte Contributory Healthcare Scheme a nih angin, All India Service Officer leh Central Service Officer, Mizoram-a deputation-a awmte a huam a; mahse, Mizoram sum senso awm lohna Healthcare Scheme dang an zawm duh zawk a nih chuan a huam lo thei bawk a ni.