CSS-a thawktu ten nawrh chhunzawm tum lo; MIGOSTU ten Badge dum bel an tum thung

All Mizoram CSS Employees Coordination Committee (AMCECC) chuan Vawiin, April ni 21 atanga Mass Casual Leave lâk tum an chu an thulh.

AMCECC thuchhuah tarlan danin, Sawrkar lakah lungawi lohna an lantir mek chungchangah DP&AR Minister K. Sapdanga, Adviser to CM (Political) Lalmuanpuia Punte, Chief Secretary mawhphurhna la mektu H. Lalengmawia leh DP&AR hotute nen an thilphut hrang hrang sawiho anih hnuin an thil phutte tihhlawhtlin dan kawng dappui an tum thu an sawi avangin Inrinni-a AMCECC Executive Committee thukhawm chuan Mass Casual Leave chu kalpui tul rih lo ah a ngai tih an sawi a, Sawrkarin an lungawi tawkna ruahmanna tha tak a siam sak zel an beisei tih sawiin, hetih rual hian Sawrkar hmalakna a vuaicha viau a nih chuan an awm zel dan tur chu Executive Committee in a rel leh ang tih an sawi. AMCECC thuchhuah chuan sawrkar nen an inbiakna ah dah ngheh an nih theih dan turah ngaihtuahna thar siam anih tur thu te leh mumal taka lak te chu Senior dan indawta luh theih dan tur bakah April ni 15 atanga ni 17-a Pen Down Strike an huaihawt chhunga hlawh cut tura sawrkarin a lo tih tawh chu an sut leh tura chak taka hmalak anih avangin Mass Casual Leave huaihawt an tum chu thulh an rel a ni.

Hetihlai hian Mizoram sawrkar School zirtirtu inzawmkhawm, Mizoram Govt. School Teachers Union (MIGOSTU) chuan sawrkar laka an lungawilohna lantir nan Vawiin April ni 21 atanga April ni 25 inkarah an hnathawhna hmunah ‘Badge dum’ an bel dawn a. MIGOSTU hian sawrkar hmasa in zirna In hrang hrang dinhmun sang zawka a hlankai te tuna sawrkarin dan siamthat ngai leh fello chhuanlama a paih chu Provincialised Status-ah dah let an phut a ni. Mizoram Govt. School Teachers Union (MIGOSTU) chuan sawrkar hmasa in dinhmun sang zawka zirna In a hlankaina Provincialised Status chu tun sawrkar Cabinet thukhawmin a hnawl bakah High School leh Middle School Headmaster kum tam tak lo thawk te Zirtirtu pangaia an tlak theihna tur an telh thar tih sawiin, heng Cabinet Meeting in a rel te hi a rang thei ang bera ngaihtuah that leh nise an duh thu bakah Provincialised Status-ah dah let an duh tih an sawi a ni. MIGOSTU chuan a tehfung an hmanna ah thingtlang leh khawpui inang renga an siam chu diklo an tih thu pawh sawiin, thingtlanga School te tan kaisan ve theihna a awm tawh dawnlo nia an hriat avangin dan thar an siam chu sut leh vat turin sawrkar chu an phut tih an sawi bawk.