Chief Minister in MHIP Member kalkhawm te ngaihhlut tur dik ngaihlu turin a chah

Mizo Hmeichhe Insuihkhawm Pawl (MHIP) General Assembly vawi 24-na chu nimin khan Aizawl-a Vanapa Hall-ah neih a ni a, he hun hmanpuitu Chief Minister Lalduhoma chuan, “Ngaihhlut tur dik tak lo ngaihlu ula, in sukthlek hmangin kan hnam hi thui tak in kaihruai thei tih lo hre reng ang che u,” tiin he huna kalkhawmte chu a chah a ni.

MHIP General Assembly-ah hian Chief Minister Lalduhoma chuan MHIP in mipuite zirtir leh rawngbawl hna a thawk nasa thin tih sawiin, Swardhar Greh leh One Stop Centre kan kalpui theihna kawngah te pawh an thawhhlawk hle tih a sawi a. “Ka bial, Serchhip District-ah chuan Sub-Headquarters MHIP ten Swardhar Greh enkawl hna hi an thawk thin a, Beti Bachao Beti Padhao Scheme kalpuinaah sawrkar an thawhpui tha thin hle. Fahrah chawmna in ‘Hmangaihte Run’ in nei a. Dan ang thlapa fa lak pawh kalpuiin, in zarah fahrah tam tak ten nu leh pa an neih phah a ni,” a ti a. Hetianga ram leh khawtlang tana hnathawk thin pawl tangkai tak a nih avang hian MHIP chu a ngaihlu tih sawiin, “Kan sawrkarin hmeichhiate kan ngaihsakzia kan tihlanna langsar tak pakhat chu, a hmasa ber atana hmeichhe Cabinet Minister kan nei hi a ni. Tha taka in lo thawhpui kan beisei. Mizoram hi India rama hmeichhiate dinhmun that berna zinga mi a nih a rinawm a, kan hmeichhiate hi kan State thawhchhuahah in inrawlhthuk hle,” a ti bawk.

Kan hnam nunphungah hmeichhiate hi zah taka enkawl an nih thin thu Chief Minister chuan sawiin, a tilang chiangtu chu kan tawng kauchheh a nih thu leh tunah phei chuan kawng tam takah mipate pawhin an tluk tawh lo tih a sawi a, “Amaherawh chu, mipate rorelna hnam kan ni a. Chhungkua ah hmeichhiaten an pasalte thu an ngaichang thin tur a ni. Thutawp siamna chi reng reng chu Pa kut a ni. Pasal nikhua lo tak, rawn tlak ngang loh in nei a nih ngawt loh chuan nu in chhungkuaah rorel lo tum suh u. In pasal te kha finchhuah ula, an mawi lohna laite hliahkhuhin timawi zawk rawh u. Chu chu nupui tha zia a ni. Zo nun ze mawi a ni satliah lova, Pathian in nupuite awm dan tura a ruat a ni,” a ti bawk a. Khawtlang thlun nghehna thirchakai chu chhungkua a ni tih pawh sawiin, “Chhungkaw tha kan din phawt chuan chawp leh chilhin khawtlang tha kan nei nghal thin. Fapa tha pakhat min hrinsak vangin kan ram leh hnam hian a thatpui hawk thei,” a ti bawk.

Hmeichhiate ngaihsan zawng mila mipa te an nun mai thin thu pawh Chief Minister chuan sawiin, “Huaisen in ngaihsan chuan mipa zawng zawngin ‘huaisen’ kan tum mai a, hausa in ngaihsan chuan, a dik emaw dik lo emaw thlu lova hausak kan tum leh mai ang. Ngaihhlut tur dik tak lo ngaihlu ula, in sukthlek hmangin kan hnam hi thui tak in kaihruai thei tih lo hre reng ang che u,” a ti a. MHIP leh tlawmngai pawl dangte chu mahni pawl thil te, Pathian thil leh Kaisara thil te thliar thiam tura chahin, “Kan hmalakna tur awm tak hi a awm a, midangte hmalakna tur awm tak pawh hi a awm mai. Engkimah inrawlh tum lo vang u,” tiin a chah bawk.

Nimin-a MHIP General Assembly hi an pawl Vice President B. Sangkhumi chuan a kaihruai a, an President Ngurmawii Sailo chuan thu sawiin, Mizo hmeichhiate hamthatna tura thawktu, kum 30 zet MHIP kaihhruaina lo thawk tawh Padma Shree B. Sangkhumi hnenah chawimawina an hlan bawk.

Vawiin hian MHIP General Assembly hi chhunzawm lehin chawhma lamah rorelna hun hmangin chawhnu lamah hruaitu thlanna an nei dawn a. Report atanga a lan danin MHIP hian Sub-Hqrs. 10, Block 30, Joint MHIP 9 leh Branch 765 a nei a. Member pawh 2,89,300 vel an awm mek a ni.

Mizo Hmeichhe Insuihkhawm Pawl (MHIP) hi July 6, 1974 khan din niin nikum July thla khan an kum 50-na an lawm tawh a ni.