Brahmaputra Board Chairman in CM a kawm

Ministry of Jal Shakti hnuaia awm Brahmaputra Board Chairman Ranbir Singh IAS chu nimin khan Chief Minister Lalduhoma chuan kawmin Mizoram-a an hmalaknate a sawipui.

Chief Minister Pisa-a an inkawmna ah hian Chief Minister chuan Brahmaputra Board in an mamawh an sawi te chu a theih anga a lo ngaihven sak tur thu a hrilh a. Central sawrkar Flood Bank Management Fund kan hmuh ve theih nan, a tul angin dan te pawh siam an tum tur thu sawiin, “Kan lui leh tuihna venhimna lam hna te, kan leilung luangral zel tur venna lama hma in lakna ah te thawhpui tur che u in kan inpeih reng a ni,” a ti.

Brahmaputra Board Chairman Ranbir Singh hian Brahmaputra Board chu kum 1982-a Central sawrkarin a din tawh, India hmarchhak a luite venhim hna te, leilung luangral ven hna te, tuihna leh lui kaihhnawih thil tul te zirchianga hma la tura din a ni tih a sawi a. Mizoram-ah Regional Office chu Zemabawk-ah mimal In luahin an nei mek tih sawiin, an hmalakna tlangpui a sawifiah a. Tunhnaia nasa lehzuala hmalakna kalpui an tum dan te pawh a hrilh a ni.

Ranbir Singh hian niminpiah tlai khan Irrigation & Water Resources enkawltu Minister PC. Vanlalruata chu a Pisa-ah hmuin tui leh a kaihhnawih thil hrang hrang a Mizoram Sawrkar nen thawhdun dan an sawiho a. Minister PC. Vanlalruata chuan Mizoram lui hrang hranga tui chhekkhawlna, Dam te chi ang siam a rawt chu Ranbir Singah chuan tha tiin hei hi an lo zirchian tur thu Minister hi a hrilh a. Mizorama hman atan Flood Zoning Act siam te leh tuihna humhalh nan Springshed Management Policy-te duan a pawimawh thu a sawi a. Kolodyne leh Khaw-thlang Tupui tana Master Plan chu Board in a buaipui mek thu Minister hrilh bawkin hemi puitlin nan Mizoram Sawrkar thawhhona leh puihna an mamawh thu te a thlen bawk a ni.