Bawlhhlawh paih lo turin ngen

Serchhip Dinthar Village Council te chuan Serchhip Zawlpui panna kawng sir-ah bawlhhlawh paih tawh lo turin mipuite an ngen.
    Serchhip Zawlpui FMC leh Serchhip Dinthar VC te hian nimin khan Joint Meeting neiin he hunah hian Serchhip Zawlpui panna kawng-a mi thenkhat ten bawlhhlawh an paih thin chungchang an sawiho a, he Meeting a an thurel bawhzui hian Serchhip Dinthar VC te hian nimin vek khan hnatlang nei nghalin Serchhip Zawlpui panna kawngsir-a bawlhhlawh paih te hi enfiahin, bawlhhlawh paihna atana hman thin te hi an hung nghal a, hei bakah hian bawlhhlawh paih khap a nih thu thuziak te an tar nghal bawk a ni. Serchhip Dinthar VC te chuan bawlhhlawh paih khapna an chhuah hi zawm theuh tura mipui te ngenin, “Zawlpui kawngdung mai nilo, Chawm lei bul leh Mat dung, Zawlpui chhung ngeiah pawh bawlhhlawh engmah paih lo a, a hmun dik takah chauh paih thin turin kan inngen bawk a ni,” an ti a. An ngenna ngai pawimawh lova ti lui an awm a nih chuan an chungah Dan anga hmalak a nih tur thu an sawi bawk a ni.