Barak River Basin Management chungchang sawiho

Nimin khan India - European Union Water Partnership (IEWP) hnuaia ‘Barak River Basin Management Plan’ duan dan tur chungchanga inrawnkhawmna neih a ni.

Secretariat Conference Hall, Aizawl-a he inrawnkhawmna hun hi Brahmaputra Board-a Chairman Ranbir Singh IAS (Rtd.) leh Chief Secretary Khilli Ram Meena, IAS te chuan kaihruaiin Chief Secretary Khilli Ram Meena chuan Barak River Basin Management Plan chuan Mizoram lui hrang hrang hrang – Tlawng, Tuivai, Tuivawl, Tuirial leh a dangte a huam tel avangin Mizoram leh heng lui hruala cheng mihringte tan a pawimawh hle dawn nia a lan thu leh inrawnkhawm hi a zau thei ang berah neih a tul dante a sawi a. Brahmaputra Board Chairman Ranbir Singh chuan Barak River Basin Management Plan duan tur hian State engemawzat a huam tel avangin inrawnkhawmna chu State tin te nen buatsaih mek a nih thu sawiin, Department hrang hrang ten tui leh lui chungchangah data leh chanchin an neih te chu he Plan duanna atan a tangkai hle dawn a, chuvangin Department hrang hrang te tawiawmna an mamawh thu a sawi bawk a ni.

He inrawnkhawmna hi India leh European Union ten tui chungchanga thawhhona an lo siam tawh India – EU Water Partnership bawhzuina hnuaia neih niin Barak basin (Tlawng, Tuivai, Tuivawl, Turial leh adangte) him zawk leh environment tichhe lo thei ang berah luipui tha tak leh chhawrtlak kan neih reng thei nana hna chi hrang hrang lo thawh tawh leh ruahmanna duan dan tur sawiho a ni a. Barak luipui leh a chhehvel humhalhna kawngah harsatna awm ang angte sawichhuah niin chungte sutkian nan he Plan hi a pawimawh hle dawn nia tarlan a ni a. Meeting-ah hian tui kaihhnawih Department hrang hrang – Irrigation & Water Resources, PHE, Land Resources, Soil & Water Conservation, P&E, UD&PA leh a dangte chuan an hnathawh te an sawi bawk a ni.