AMC chu lirthei dahna tur In chhawng sakna ah cheng vbc. 7.85 chuang felhlel taka hmangah puh a ni

Local Fund Audit on the Accounts of Local Authorities Director Report-ah Aizawl Municipal Corporation (AMC) chu Bawngkawn-a lirthei dahna tur In chhawng sakna a cheng vbc. 7 leh nuai 85 chuang felhlel taka hmanga puh niin hemi chungchanga AMC insawifiahna chu Auditor-te chuan an pawm lo nia tarlan a ni.

He Report-a a lan danin AMC hian Bawngkawn Sairang peng bulah Atal Mission for Rejuvenation & Urban Transformation (AMRUT) hnuaiah lirthei dahna chhawng (Multi-Level Parking) din turin ruahmanna an siam a, he In sakna atan hian a tira hnathawktu (Contractor) nena an inremna aia za zela 226 dawn sum sen a ni. Audit report-in a tarlan danin lirthei dahna tur sakna hmun hi Lalbiakdiki ram a ni a,ram neitu nen hian November ni 22, 2016 khan inremna siam a ni a. He In sakna atana senso tura a tira ruahman chu Rs. 2,63,91,812/- a nih laiin sum ruahman hi Rs. 8,59,81,032/- ah tihpun chhoh a nih thu Report chuan a sawi a. A tak taka he lirthei hunna tur In sakna atana senso chu Rs. 7,85,85,613 niin Auditor-te chuan an sawi a. AMRUT-in a tum chu mipui mamawh chi hrang hrang - tui, tui paihna felfai, khawpui a veivahna leh hahdamna hmun (park) din te a ni a, hei hi mirethei zawkte leh rualbanlote tana a bika ruahmanna pawh siam tur a ni. Chutiang a nih lai chuan he lirthei dahna In an sakna ah hian AMRUT inkaihhruaina hi zawm a ni lo niin Report chuan a tarlang a. Inremna an siamah chuan he In hi kum 30 atan tih a nih laiin Audit a nih hun lai kum 6 hnuah pawh he In atang hian AMC in cheng khat pawh a la hmulet lo mai ni lovin, tun thleng hian he lirthei dahna Inchhawng hi hman tangkai a la ni lo a. Chuvangin cheng vbc. 7.85 chuang senna hi tul lova mipui sum senralna mai niin Audit Report chuan a tarlang.

AMC thuneitute chuan he lirthei dahna In chhawng hi a tirah AMRUT sum hmanga sak an tum naa AMRUT sum hi an hmang leh ta lo niin an sawi a. Chu bakah August ni 4, 2022-a AMC Executive Council thukhawm chuan lirthei dahna in chhawng hi ‘AMC Plaza, Bawngkawn’ tiin a hming an thlak thu an sawi bawk a. Feb. ni 15, 2024 khan AMC Plaza hi Zote Projects, Zar-kawt-in kum thum (3) chhung atan inremna ziah a ni a. Thla tin Rs. 3,80,000/- chawi a luah hawh tura inremsiamin, kum 20 chhung kumtin za zela 5 a luah man pung turin an inrem tih an sawi a. Hei hi Auditor-te chuan an pawm lo thung a ni.