MZP President in Mizoram chhung ngei a nih thu sawi

Mizo Zirlai Pawl (MZP) General Hqrs. President H. Lalthianghlima chuan tunhnaia Mizoram chhunga Tripura sawrkarin kut a rawn thlakna Phuldungsei Jampui Hills khuaa Thaidawr tlang chu 1933 Regulation-ah Mizoram ramchhung a nihna chiang takin a lang nia sawiin, chak taka hma la turin Mizoram sawrkar an phut tih an sawi.

MZP President leh hruaitu thenkhat te chuan nimin khan Thaidawr tlang hi tlawhin he hunah hian MZP President chuan Mizoram chhunga Tripura sawrkarin hma a la chu pawi an tih thu leh an ngaithiamlo hle tih a sawi a, kut an thlakna hmun chu 1933 Regulation-ah Mizoram chhung ngeia awm anih thu sawiin, Mizoram sawrkar chu a rang lama hma la vat turin an phut thu a sawi a, Thaidawr tlang ah tunhma in Mizoram sawrkarin kawng alo lai tawh thin tih sawiin, tunhnaiah hmalakna a awm tak loh avangin Tripura sawrkar an rawn che ta nia ngaih theih a nih thu leh Mizoram lam chet lak ve vat a ngaih thu a sawi a ni.

Tunhnaia Assembly thutkhawmah Hachhek bialtu MLA Robert Romawia Royte chuan Phuldungsei khuaa mi 85 te Ration Card chu paih sak an ni tih sawiin, Supply Minister B. Lalchhanzova chuan mi 85 te chu Tripura lama Aadhar ah ziahluh an lo nih tawh thu leh dan angin ram pumah mi pakhatin Ration Card pakhat aia tam a nei thei loh avangin Tripura lama ziahluh an nih tawh avangin Mizoram lama an hming chu khawl hmanga paih a ni a ti a, chhungkaw 21 a member 85 te chu Mizoram sawrkar chuan khua leh tui humhim nan Manual Ration Card siam sakin, AAY quota angin thla tin buhfai kg. 35 pek thin an ni tih alo sawi tawh a ni.