Sawhthing leina a sum chingpen nia sawi sum pekchhuah hmain hum hman a nih thu sawi

Agriculture Minister PC. Vanlalruata chuan nikum lama Sawhthing a leina-a sum chingpen nia sawi chu sum pekchhuah hmaa hum hman a nih avangin hmuh let tur a awm lo tih a sawi a. “Secondary Collection Centre thenkhat atangin Sawhthing hralhna data dik lo upload vanga Sawrkar Price support pek tur pung ta hluai kha a ni,” a ti.

Nimin-a Mizoram Legislative Assembly thutkhawm ah MNF Member paruk - Lalchhandama Ralte, Ramthanmawia, H. Lalzirliana, Lalrinsanga Ralte, K. Laldawngliana leh R. Rohmingliana bakah INC Member C. Ngunlianchungate zawhna intawm chhangin Agriculture Minister PC. Vanlalruata chuan nikum-a Sawhthing leina cheng vbc 4 - 5 chingpen nia sawi awm chungchang hi a sawifiah a. Minister chuan, “Nikum 2025 chhunga Sawhthing leina cheng vbc. 4-5 chingpen nia sawi kha sum release hma-a hum hman a nih avangin hmuh let tur a awm lo,” tiin “Nikum July 2025 thla khan thil fel lo a awm tih hriat a ni tawh a, MAMB chuan Investigation Team dinin vawi 4 (li) lai SCC hrang hrang leh an khaw tuamte tlawhchhuakin an fehchhuak tawh a. Mi thenkhat, pamham zualin an Sawhthing tharchhuah ni lo, hmundang daih ami man tlawm zawka lei khawmin, SCC kaltlangin anmahni tharchhuah anga hralh an lo tum a. Portal-ah pawh an thunlut fel vek tawh tih hriatchhuah a ni. Investigation Team-in Sawhthing, mahni tharchhuah ngei hralhtu nia an recommend-te hnenah chauh Support Price pek an ni,” a ti.

Sum tichingpentute chunga action lak a nih dan zawhna chhangin Agriculture Minister chuan, “SCC thenkhat atangin Sawhthing hralhna data dik lo upload vanga sawrkar Price Support pek tur a pung ta hluai a ni. Hei hi sum release a nih hmaa finfiah niin, data dik lo siamthat a ni a, Sum chingpen tur pawh hum hman a ni. Sum chingpen a awm hman loh avangin tu chungah mah action lak a ni lo,” a ti bawk a. “A taka sum tih chingpen a awm hmain Enquiry/ Iinvestigation kalpui nghal a ni a. Investigation Team-in mahni Sawhthing thar ngei hralhtute nia an recommend-te hnenah support price pek zel an ni,” tiin February ni 17, 2026 thlengin Complain lut chinfel loh a la awm avangin thil sual tih tum nia hriatte hming tarlan erawh ala remchang lo tih a sawi a. SCC sum chingpen tumnate chu Farkawn, Khuangleng, New Champhai leh Ramhrangkawn te niin a sawi bawk.

Agriculture Minister chuan SCC-ah Sawhthing leina tur zat sawrkarin a bituk thu pawh House chu hrilhin, “Sawrkar rate baka Rs. 50 a tlin lohnaah chuan Support Price pek a ni ang. Sumdawngte min nep tumin an tangrual mek. A to zawka hralh turin sawrkarin ruahmanna a kalpui mek. Sawrkar, SCC leh kuthnathawktute tanho a tul,” a ti a. Support price beisei lo tan a hralh theih leh theih loh zawhna chhangin Agriculture Minister chuan, “Support price beisei lo tan chuan hralh theih reng a ni a, hralh phal loh a awm lo,” a ti a, Sawhthing-a support price pek chu thil thar, tu sawrkarah mah an la tih ngai loh thu a sawi bawk.

Hei bakah hian MNF Member Ramthan-mawia zawhna pawh chhangin Agriculture Minister PC. Vanlalruata chuan nikum 2025 chhunga Loneitute Sawhthing a leina bat sak sawrkar in a neih loh thu a sawi a. BJP Member Dr. K. Beichhua zawhna chhangin kum 2024-25 chhungin Sawrkar in Sawhthing lei kaihhnawih leh Support Price atan Rs.1,41,16,84,410.50 a sen thu leh Sawhthing hralhna atangin Rs. 12,78,07,290 hmuh let a nih thu a sawi bawk a ni.

MNF Member Prova Chakma zawhna chhangin Agriculture Minister chuan Mizoram Sawrkar chuan February ni 2, 2026 atang khan Secondary Collection Centre 64-ah Sawh-thing a lei tan tih pawh a sawi a, Sawhthing atan Empanelled Buyers thlan an nih loh thu a sawi a. Zawhna dang chhangin FOCUS 2.0 chuan Mizoram District zawng zawng a huam tur thu Minister chuan a sawi bawk.