Digital Content Creation Centre leh Library hawng

Institute of Advanced Studies in Education (IASE) Mizoram kum 50 tlinna (Golden Jubilee) lawmna puala IASE hnuaia Digital Content Creation Centre leh Digital Library-te chu nimin khan Higher & Technical Education Minister Dr. Vanlalthlana chuan a hawng.

    Digital Content Creation Centre leh Digital Library hawnna hunah hian Minister Dr. Vanlalthlana chuan IASE-in kum 50 hmel a hmu thei chu a lawmpui hle tih a sawi a. Sawrkar pawhin IASE chu theitawpa chhawmdawl zel a tum tih sawiin, ram leh hnam siam that kawnga a thawhhlawk thei ber zinga mi Zirtirtute chherchuahna hmun a nih angin IASE chu zirna In pawimawh tak a ni tih a sawi a, IASE a zirlaite chu Zirtirtu an nih hunah pawh Zirlaite tana entawn tlak leh ngaihsanawm tak nih tum tur te, an zirlaite thinlungah thil chik peihna (critical thinking) tuh tum thin tur tea chahin, Ram leh hnam siam thatna kawnga Sawrkar chu theihtawpa thawhopui zel turin a sawm nghal bawk a ni. Nimin-a he hun hman hi H&TE changtu Commissioner & Secretary, H. Lalengmawia IAS chuan kaihruaiin IASE chanchin leh Report hrang hrangte ngaihthlak a ni bawk.