Posts

Pathianni-a thli leh ruah thawk avangin Serchhip District-ah In chhia 60 chuang a awm

Image
Pathianni zing-a ruahsur leh thli na tak tleh avang khan Serchhip District chhunga khaw 14-ah chhiatna a thlen thu dawn ni tawhin chenna In luah zui tlak loha chhia 4 a awm a, In dang 65 te pawh thli leh ruah avang hian chhiain Biak In chhia pakhat a awm bawk.

Hrangturzo bialtu MLA in chhiatna thlenna a tlawh

Image
Pathianni kalta zing-a thlipui leh ruah thawk in Hrangturzo bial-a chhiatna a thlen hrang hrang te chu nimin khan bialtu Bialtu MLA leh Adviser to Chief Minister (Political) Lalmuanpuia Punte chuan a hmunah a tlawh.

Lo hal atanga ram kang report dawn a awm lo

Image
Mizoram sawrkar in kumin a Lo hal hun a bithliah a liam hnuah Serchhip District-a Lo vat te chuan an hal kim hman nia thudawn a ni.

Thenzawl-a Police ten Zu siamna hmun an tichhia

Image
Serchhip District Executive Force, Thenzawl Police Station-a thawktute chuan tunhnai khan Thenzawl leh a chhehvel-ah Zu leh ruihhlo dap-chhuah hna thawkin ‘Special Drive’ an nei a, nimin chawhma lam khan Thenzawl khawchhung leh a chhehvel daihnai ah Zu siamna hmun dapchhuah hna thawkin Zu bilhlai zem 12 zet an tichhia a, a vaiin Zu litre sang thum chung chhuah theihna tur nia chhut niin cheng nuai 10 chuang hu zet nia chhut a ni bawk. Heng Zu bilhlai neitute hi hriat an ni lo thung.

Exit Poll/Opinion Poll khap

Election Commission of India chuan Lok Sabha Inthlanpui neih turah R.P. Act, 1951 hnuaia Section 126A, sub-section (1)-in thuneihna a pek tlawhchhanin April ni 19, 2024 (Zirtawpni) zing dar 7:00 atanga June ni 1, 2024 (Inrinni) tlai dar 6:30 inkar hian Exit Poll result tarlan a khap a, he khapna hian Print leh Electronic Media zawng zawng bakah chanchin thehdarhna hmanrua hrim hrim a huam a ni.

PC in Symbol thlak sak duh lo

PC Party chuan Lok Sabha Inthlanpui neih turah Symbol atana ‘Electric Bulb’ hman an dil chu a chhanna an hmuh mai loh avangin Free Symbol zingah ‘Hamrik’ chu an thlang tih an sawi a. Hetihlai hian Candidate te hming leh an Symbol te a tarchhuah vek hnuah ECI lehkha avanga ‘Electric Bulb’ a thlak sak leh an ni tih sawiin, Campaign an neih hnua Symbol thlak sak chu an duhloh thu leh ‘Hamrik’ chu hman ngei an duh thu an sawi.

Inthlanpui-a Duty boral

Mizoram-a Lok Sabha Inthlanpui neih tura Duty tura Khawzawl atanga Saitual-a kal Hav. F. Zosia (54), 2nd Bn. IR chu nimin khan Saitual damdawi In-ah a boral a, a ruang hi nimin khan Khawzawl-ah lak nghal a ni. F. Zosia te hi Saitual DC Office hlui ah an inkulh a, thâwk lamah harsatna a neih avangin nimin zing khan Damdawi In-ah hruai a ni a, hemi hnu lawk hian a boral zui ta nia thudawn a ni.

e-Postal Ballot thawnchhuak

Mizoram-a Lok Sabha Inthlanpui neih tur atan venhimna lama hnathawktu Service Voter 4,963 te hnenah e-postal ballot (Electronically Transmitted Postal Ballot) thawnchhuah a ni a, hei hi Service Voters te hian lo print in Vote an thlak hnuah RO hnenah an thawnlet leh dawn a ni.

VC ten Tuizem an sem

 Lunglei District-a Lungsen-I Village Council chuan 15th Finance Commission 2021-2022 (Tied Grand) atangin nimin khan Tuizem 28 an sem a, tun tumah hian Plastic Tuizem litre 1000 dawng chu Lungsen Chhim Veng-a chhungkaw 26 hnenah leh YMA Chhim Veng Branch bakah Gospel Centenary English School Lungsen hnenah an pe a ni. Lungsen-I Village Council President C. Lalremruata chuan Lungsen hi tui harsatna khua a nih angin Fur laia ruahtui khawl a tul zual hle tih sawiin, an huamchhunga In tinah Plastic Tuizem hi tumin hma an lak mek thu leh nikum lam chhungkaw 56 an sem tawh thu a sawi bawk.

Kangmei ven dan thlirho

Aizawl District-a kangmei venna kawnga hma latu, District Level Committee on Fire Prevention chu nimin khan an Chairman leh Aizawl DC Nazuk Kumar IAS hovin an thukhawm a, he hunah hian kumin Thal laia kangmei venna kawnga an hmalak dan te tarlan niin kum 2024 kumtir leh tun inkarah Kangmei chhuak vawi 308 chhinchhiah a ni a, heng Kangmei chhuak hian ram hectare 498.61 a tuam a. Lo hal hun tur ruat ah thingtlang khua ten lo an hal deuh vek a, Khawpuar chiahin Lo hal hun bituk pel ah Lo an hal a, he Dan bawhchhiatna chungchangah hmalak dan tur pawh rel ho nghal a ni bawk. Aizawl Bawrhsap chuan Kangmei chhuak tur ven kawnga mipui zirtirna kalpui chu a tha thawkhatah a ngaih thu sawiin, tanlak chhunzawm erawh a ngaih thu a sawi a, thingtlanga ramkang venhim kawngah hmalakna kalpui ang thovin AMC huamchhun gah pawh he hmalakna pawimawh tak hi chak zawka kalpui a ngai tih a sawi bawk.