Posts

Serchhip District-ah thli tlehin In engemaw zat tichhiain Pavalai Intawhkhawmna tur Pandal a chhe vek

Image
Nimin zing-a thli na tak tleh avang khan Serchhip District chhungah In chhia engemaw zat awmin Electric Line chhia engemaw zat a awm bawk a, mihring thi leh hliam awm lovin tun thla ni 12 atanga East Lungdar-a Kohhran Pavalai Pawl Intawhkhawmna neihna tur Pandal sak zawh thawkhat tawh chu thli hian a tichhe vek bawk a ni.

Kohhran ten Isua Thawhlehna ni an hmang

Image
Isua Krista thihna hneha a thawhlehna ni, Easter Sunday chu nimin khan hmun hrang hrang ah urhsun taka hman a ni.

Police ten Heroin an man

Image
Serchhip Police te chuan Inrinni zan dar 11:00 vel khan Serchhip P&E Veng-a T. Lalnunsanga In-ah Heroin nia hriat cane 27 an man a, a vaiin gram 11.43 a rit niin a neitu nia hriat Lalhma-chhuana (44), Aizawl Luangmual Veng nia insawi pawh man nghal a ni a, thubuai siam sak nghal a ni bawk.

Fisheries hruaitu thlang

Image
Serchhip District Fisheries Association te chuan Inrinni khan Serchhip Kawnpui North VC Hall-ah kum 2024-2026 chhunga hruaitu tur thlanna neiin President-ah Kapliana Pachuau (Bazar Veng); Vice President-ah Hmangaihthanga (Vengchung); Secretary-ah K. Laldaihvela (Bazar Veng); Asst. Secretary-ah HL. Muanthanga (AOC Veng); Treasurer-ah LR. Bawlliana (Bazar Veng) leh Fin. Secretary-ah H. Thangtluanga (Leisang Veng) te thlan an ni.

Electric man vangin boral

Tlabung Sub-Division huamchhung Sihphirtlang khaw mi Chando Kumar (38) chu Zirtawpni zan khan Electric currnent man vangin a boral a, thudawn danin Chandro Kumar hi Zirtawpni khan a nupui nen chawhmeh zawngin ram-ah kalin Electric ban bula a zun laiin Electric current hian a man niin a nupui hian a sawi a ni.

Kangthelh dan zirhona nei

Aizawl Maubawk Branch YMA Disaster Sub-Committee kaihhruaina in Inrinni khan Tlawng lui, Tuithum chhuah-ah kang thelh dan leh chhan hhuahna hna thawh dan inzirtirna neih a ni a, he hunah hian mi 30 vel telin UD&PA Department atanga an dan Fire Fighting pump hman dan te zirho a ni bawk. 

Lirthei dan zawm lo man tam

Aizawl Traffic Police te chuan kar kalta chhung khan dan zawm lo lirthei 156 manin heng mite pawisa chawi tlingkhawm chu Rs. 97,000 a tling a, lirthei man zinga tam ber chu Two Wheeler niin 88 an man a, LMV 50, HMV 15 leh Taxi 5 te an man bawk. Lirthei park-na hmun lova park 47 manin tlan phal lohna a lirthei tlanlut 13 man a ni a, mahni tlan ni ni lova tlan 42 manin CMV Rules 1989 bawhchhia 23 man an ni bawk a, Traffic tibuai zawnga lirthei khalh mi 6 man an ni bawk.

Aizawl tuilakna enchhin a ni

Tanhril Setlak ram atanga Aizawl khawpui chawmtu tur tui lakna siam thar, Augmentation of Water Supply & Construction of 37-MLD Water Treatment Plant (Phase-3) chu Ningani khan hlawhtling taka enchhin a ni. Thudawn danin he tuilakna hna thawh mek hi nikum September thla khan Diesel khawl hmanga enchhin niin hlawhtling takin tui pump chhuah a lo ni tawh a, Diesel khawl hi kawlphetha awmloh thulha hman tur a nih avangin Ningani tlai khan SIPMIU leh PHE Department-a thawktute chuan kawlphetha hmanga Tui pump-na khawl hi an enchhin leh a, hetah hian Setlak lui in Tlawng lui a finna atangin Aizawl Laipuitlang-ah hlawhtling takin tui hi pump thlen a ni.

CM in Treasury a tlawh

Chief Minister Lalduhawma chuan sawrkar tangka kum, kum 2023-2024 Financial Year ni tawp ber nimin khan Aizawl North Treasury leh South Treasury tlawhin an hnathawh dan a enfiah a, harsatna leh buaina awm lova tangka kum tha taka khar fel a ni chu lawmawm a tih thu a sawi a, sum neih ang angte renchem tak chung leh daihzai taka hman a ngai tih a sawi a, Treasury a thawktute thawhrimna fakawm a tih thu a sawi bawk. Chief Minister hi Vanlalfaka, Treasury Officer, Aizawl North Treasury chuan a lo dawngsawng a, Adviser to CM (Finance) TBC. Lalvenchhunga leh Finance Department a Officer pawimawh ten an tawiawm bawk a ni.

LADC-ah sawrkar ngelnghet din thuai an beisei tih sawi

Lai Autonomous District Council (LADC) Sawrkar buaina avanga Governor hnuaia LADC sawrkar thuneihna a awm hnuah Lairam Democratic Progressive Alliance (LDPA) chuan reilote ah Sawrkar ngelnghet leh langtlang, mipui Sawrkar din an in beisei tih an sawi.