Lenkawl

Serchhip District Consumers Association (SDCA) chuan Serchhip khawpui chhunga Delivery/Courier Agent te chu an hnena bungraw lo thleng te a chahtu ten an chah man an pek ang ngeia an hnena thlen thin turin an ngen.

DIET Serchhip chuan kumdanga an lo tih tawh thin angin nimin khan III Semester zirlaite Project Work Report ngaihthlak na hun an hmang.

November 17 leh 18, 2023 chhunga Mizoram hmun hrang hrangah ruah sur leh thli thawk tur anga sawilawk a nih avangin Serchhip District mipuite chu fimkhur tura chah an ni.

Manipur atanga sahimna zawnga Mizorama awm mekte tanpuina atana Mizoram sawrkarin sawrkar laipui atanga tanpuina cheng vbc. 10 a dil chu tun thlengin pek a la ni lo. Home Department thuneitute sawi danin sawrkar laipui, Ministry of Home Affairs hnena Manipur Zofa, an State chhunga chi leh chi inkara tharum thawhna nasa tak avanga Mizoram-a sahimna zawnga rawn tlanlutte tanpuina tur sum dil chu thla 6 ral hnuah pawh pek a la ni lova. Kumin September thla a raltlan te mamawh tura chhut sawrkar laipui-a thehluh pawh tun thlengin pek ala ni lo bawk.

Ram leh hnam veite intelkhawm, Global Mizo Council chuan ram tina awm Mizote inpumkhat tur leh ram leh hnam kalsiam tur rel khawmna hmun Inpui turin Global Mizo Council buatsaih chu an thil tum a nih thu an sawi.

Mizo Zirlai Pawl (MZP) chuan Zirlaite Scholarship 2nd installment chu nimin, Nov. 17, 2023 chawhnu atang khan a dawngtu tur zirlaite Account-ah a lut tan ta tih an sawi a. Tribal Scholarship First installment hi kumin February thlaah zirlaiten dawngin, Second instalment pawisa hi Central atangin Sept. ni 25, 2023 khan sawrkar-in a dawng a. Election a nih avangin leh thawktute chet muan avangin sem mai theih a ni ta lo nia sawiin, MZP-in ni 3 chhung nasa taka a nawr hnuah zirlaite account-ah a lut ta tih sawiin, an enzui zel dawn tih an sawi bawk.

Tunhnaia Myanmar ramchhung Khawmawi leh a bulhnaia inkahna thleng avanga Myanmar Border Trade Point, Tiau kaltlang ram pahnih te inkalpawhna khar chu hawn a ni leh ta a, he buaina avanga ramri kan-a Mizoram-a raltlan rawn lut tam zawk te pawh an kir leh tawh a ni. India leh Myanmar inrinaa sipai Camp te hi CNA, CDF Hualngoram leh PDA ten an lak hnuah Zokhawthar leh Khawmawi inkalpawhnaah an duty tawh dawn tih CDF Hualngoram hotute chuan an sawi a. Helaiah hian Myanmar rambuai hma khan Burma sipaite an duty thin a, PDF ten an lak hnuah sipaite hian chhuhsak lehin vengtu mumal awm lovin hun rei tak chhung a kal hman a ni.

Human Resource Development Board Vice Chairman Dr. L. Thangmawia MLA chuan nimin khan nimin khan New Delhi-a Election Commission of India (ECI) Office tlawhin Mizoram inthlanpui avanga zirlaite Scholarship pekchhuah phal tura an ngenna te lo bawhzui sak a, ECI in phalna a pek nghal avangin Principal Secretary Darsuo Thang hnenah lawmthu a hrilh a. Chief Election Commissioner hnenah Mizoram a vote chhiar hun December 3, 2023 (Pathianni) a neih tura ruahmanna awm mek chu Mizoram a Political party hrang hrang, NGO leh Kohhran te duhdan anga a hma Inrinni emaw, a tuk Thawhtanni emaw a sawn tura ngenna lehkha thehlut bawkin, MLA candidate, an vote neihna Constituency ni lo a in candidate, a duhte tana dil theih tura Postal ballot-a vote thlak phalsak tawh thin tura ngenna a thehlut tel bawk.

MNF Adviser Lalruatkima chuan MNF in sawrkarna an lak leh a ring tlat tih sawiin, “Hnehna kan chang a nih chuan mipuite hnenah lawmthu sawi hi kan tih tur hmasa ber a ni ang,” a ti.

Mizoram Pradesh Congress Committee (MPCC) chuan nimin khan Aizawl-a Congress Bhavan-ah lawmthu sawi inkhawm an nei.