Lenkawl

Serchhip District Police te chuan khawchhak lam atanga dan lova lakluh nia hriat Kuhva hring bag 190 zet chu Ningani khan manin Inrinni khan Custom Preventive Force te kuta hlan tura tih a ni.

Salvation Army chuan nimin Pathianni kha ni pawimawh Naupangte Pathianni, Young People (YP) Sunday atan an hmang a, Mizoram khaw hrang hranga Salvation Army Corps leh Society te'n YP Sunday hi urhsun taka hmangin Serchhip a Corps hrang hrangah pawh he ni hi urhsun taka hman a ni. He ni pual hian Salvation Army Corps hrang hrang chuan chawhma Inkhawmah YP pual Programme hlimawm tak hmangin, Sunday School Department hrang hrang ten Zaipawl, Chang sawirual, Solo leh Special items dangte an entir a, Commanding Officer leh Kohhran puipate hnena atangin YP Sunday pawi-mawihna leh naupang te nunkawng dik inzirtirna lam hawi Pathian thuchah hrang hrang ngaihthlak a ni bawk.

Inrinni leh nimin khan Serchhip District-ah COVID-19 hri kai leh enkawl dam chhinchhiah belh an awm lova, nimin tlai thleng khan Serchhip District-a COVID-19 hri kai hmuh tawh zat chu 14,668 niin an zinga 14,622 te enkawl dam an ni tawh a, hri kai enkawllai mi 9 awm mekin hri kai te zingah mi 37 an boral tawh a ni.

Chief Minister Zoramthanga chuan kumin HSLC exam-a Topper Cynthia Lalhlupuii Shang-pliang, a bial Aizawl East-I chhung ami ni bawk chu Inrinni khan Falkland a chenna In-ah tlawhin lawmpuina thuziak leh Laptop a hlan a, a kal zelna turah duhsakna a hlan nghal bawk. Chief Minister hian tunhnaia Manipur buaina avanga raltlan Berawtlang Art & Culture hmuna awm te chu tlawh bawkin an mamawhte sawrkar hnenah thlen hreh lo tura chahin tanpuina tangkafai a pe bawk a. Art & Culture building-a awm mek te hi an vaiin mi 33 niin naupang 30 leh anmahni enkawltu 3 te an ni a. Manipur-a enkawltu nui leh pa nei tawhlo chawmna hmun atanga lo kal an ni.

Kar hmasa kar tir lama thlipui tleh in Siaha District a nuai avanga chhiatna thlen dan kim-chang hriat theih a ni ta a, he thli tleh avang hian Khua leh Veng hrang hrangah In luahzui tlak loha chhia 27 awmin chhe nel nual 20 a awm a, a then chhia 79 awm bawkin heng zingah hian Refugee Camp 2 a tel bawk a ni. Siaha District Disaster Management Authority chuan heng chhiatna thleng report an dawn te hi a theih ang chin chin endikin, State sawrkar a report an pek hnuah State sawrkar in tanpuinna a ngaihtuah sak thei a nih chuan hmalak a ni ang tih thuneitute chuan an sawi bawk.

Tunhnaiah Champhai District-a Vawk hri, African Swine Fever (ASF) hmuhchhuah leh a nih hnuah ASF vanga Vawk thi chu 83 zet an tling leh ta a, District dangah ASF hri leng hmuh ala awm rih lo thung a ni. ASF vang hian Champhai District-a Ngur khuaah Vawk 69 an thi tawh a, Champhai Zote-ah Vawk 11 an thi tawh bawk a, ASF vei nia rinhlelh vawk 38 tihhlum a ni tawh bawk.

Aizawl Municipal Corparation (AMC) chhunga Ward hrang hrangte chuan Inrinni khan Reduce, Reuse, Recycle (RRR) Collection Center an hawng. RRR Collection Center-ah hian Plastic Bottle, Thawmhnaw hlui leh puan hlui, Pheikhawk hlui, Chanchinbu hlui, zirlaibu hlui leh lehkhakhawng lam chite dahkhawm theih reng a ni dawn a, Centre hawn a nih atanga June ni 5, 2023 thlengin ni tin zing dar 7:00 atanga chawhnu dar 1:00 thleng dah theih a ni ang. Heng bungrua dahte hi mamawhtute'n a thlawnin an mamawh angte chu an la thei dawn bawk a ni.

Myanmar atanga Mizoram-a raltlan zirlaite pual bika Siaha-a School din chu Zirtawpni khan Chin State Chief Minister hlui Ni Sui Lian-i chuan a hawng. He School hi Myanmar ramhnuai sawrkar National Unity Government hriatpuia din niin a din tirh ah Myanmar raltlan naupang 192 chu an inziaklut a, Vawiin May 22, 2023 hian Class tan a ni ang. He School hotulu ber tur Dr. Pen Hmung Ling chuan Myanmar zirlai lehkhabu hmanga zirna hi kalpui a nih tur thu sawiin, mimal School pakhat-a zirlaite ban hnu, chawhnu dar 3:00 atangin School hi an hmang ve dawn a, Siaha-a Myanmar Refugee Committee in an enkawl ang. MBSE buatsaih Pawl 10 tana HSLC Exam-ah khan Myanmar raltlan zirlaite’n an ti tha hle nia thudawn ni bawkin Farkawn khua atanga zirlai Exam te chuan an pass vek a, mi 3 in Distinction-ah an pass nia thudawn a ni bawk.

Tunhnaia Manipur State tualchhung buaina avanga Manipur-a cheng Zohnahthlak Hnam pual pawl hrang hrangte intélkhawmna tura din thar, Indigenous Tribal Leaders Forum (ITLF) hruaitute chuan an Chairman Pagin Haokip hovin Central YMA hruaitute an kawm.

Mahni Thirsakawr (Bicycle) khalh a India ram fanchhuah tum mek tu Aasha Malviya-i chuan Mizoram rawn tlawhin Governor leh Chief Minister te a kawm.

Mizoram sawrkar Taxation Department chuan sawrkar kumthar hnu, April, 2023-ah Chhiah Rs. 1,34,78,34,419 a hmu nghal a, thla khat a chhiah a hmuh tam ber a tling nia hriat a ni.

Tun dinhmunah Mizoram sawrkar hnuaiah hnathawk MR/PE atanga Group A-ah mi 49,282 an awm mek a, chung mite thla khat hlawh atana sen thin chu cheng Vbc. 334.20 a tling. Hetihlai hian tun dinhmunah sawrkar hnathawkten awlsam zawka GP Fund an hman dan tur ruahmanna a awm rih lo.

Mizoram-a Kohhran hrang hrangte inzawmkhawmna tur, Council of Churches in Mizoram-a Kohhran te inpumkhatna leh thawhhona tur ruangam leh kalphung tur an duan chu pawm a ni a, mahni Kohhran inkhawmpuiah theuh ngaihtuah leh hnuah la thutkhawm leh nise an ti.

Aizawl khawpui chhunga Iron Rod, Cement leh Balu dawr siam zingah dan lova Hnamdang mite thurualpuia siam nia hriat dawr te chu Central YMA hruaitute chuan Inrinni khan an dawr-ah theuh kal chilhin khar turin an ngen a, dawr engemaw zat chu khar nghal a ni.

Mizoram Youth Commission (MYC) Chairman Dr. Vanlaltanpuia chuan, “United Kingdom-a thawk turin Mizo thalai nurse a tam thei ang ber thawn kan tum a ni,” a ti.

Tunhnaia Mizoram-a COVID-19 hri kai hmuhchhuah an nih leh hnuah May thla chhungin COVID-19 vangin Mizoram-ah mi 6-in nunna an chan tawh a, kumina COVID-19 vanga nunna chante hi hri kai hmuhchhuah tam zawng atanga za zela chhutin a sang hle.

Mizoram Board of School Education (MBSE) in nimin-a pawl 12, Higher Secondary School Leaving Certificate (HSSLC) Exam result a tihchhuah ah Serchhip District-a zirna In hrang hrang ten an titha thawkhat hle.

Kum 2023-2025 chhunga Serchhip Sub-Hqrs. YMA hruaitu thlanna neih a nih hnuah Sub-Hqrs. YMA Coordination Committee (SCC) thutkhawm hmasa ber chu nimin khan neih a ni.

Thla thar June 30-a Serchhip-a Remna ni hman dan tur chu nimin khan District Bawrhsap Nazuk Kumar IAS hovin sawrkar leh khawtlang mi pawimawh ten an sawiho. He thutkhawm DC Meeting Hall-a neih ah hian State Level Committee in Remna Ni 2023 lawm dan tur ruahmanna a siam hrang hrangte Serchhip District a kalpui dan tur ngaihtuah a ni a. Remna Ni pual hian Free Health Camp te, Digital Flyers & Short Video Making Competition te, Cleanliness Drive te, Peace Walk te, Blood Donation Camp te leh Tree Plantation te, Painting Competition and Photography Exhibition te, Quiz leh Essay Competition te buatsaih tum a ni a. A lawmna pui ber hi Serchhip DC Conference Hall-ah buatsaih a ni bawk ang. Heng rua-hmanna hrang hranga mawhphurtu turte ruat nghal an ni a, hlawhtling taka Remna Ni hman a nih theih nan inbuatsaihna hi kalpui tan nghal tura rel a ni bawk.

Mizo Zirlai Pawl (MZP) Hqrs. Serchhip chuan MBSE in High School Leaving Certificate (HSLC) leh Higher Secondary School Leaving Certificate (HSSLC) Result a tihchhuah taka MZP Hqrs Serchhip huamchhunga zirlai hlawh-tlinna chang thar zawng zawngte an lawmpui thu leh an kal leh zelna turah duhsakna an hlan thu nimin khan thuchhuah siamin an tarlang a. Hlawhtlinna chang zo ta lo te pawh beidawng lova theihtawp chhuah a hlawhtlinna tha zawk chang leh vek turin duhsakna an hlan bawk. MZP chuan tuna zirlaite hi nakin lawka ram rorelna fawng la vuan mai tur, Mizoram hmathlir an ni tih tarlangin, taimakna leh rinawmna nena an hmabak bei zel turin duhsakna sang ber an hlan tih an sawi bawk.