Posts

Serchhip-a MNF ten kumin-a Chhung Inkhawm hmasa ber General Hqrs. Adviser hovin an nei

Image
MNF Serchhip East Block chuan nimin khan Serchhip Venglai-a Mizo Hnam Run-ah kumin atana Chhung Inkhawm hmasa ber neiin MNF General Hqrs. Adviser J. Malsawmzuala Vanchhawng chuan MNF Party mipuite chu thuhnuai rawlh tak chunga politics-a a tha zawnga danglamna thlentu ni tura inbuatsaih turin a chah.

Serchhip DCSO hnuaia mi sing nga chuang ten kumin chhung a thlawnin buhfai la thei dawn

Image
Sawrkar laipui in AAY leh PHH te tana a thlawna Ration buhfai a sem chu Serchhip DCSO hnuaia mi sing nga chuang te pawhin an chhawr tangkai thei dawn a, Ration buhfai hi heng mite hnenah hian a thlawna semchhuah tan mek a ni.

Lawmpuina pawisafai hlan

Image
North East Zone Girls and Youth Women Boxing Championship 2022 neih zawh taka Gold Medal latu Vanlalrinngheti (New Serchhip) chu Sports Minister Robert Romawia Royte chuan Rs. 10,000/- a hlan.

MPCC President in hmanpui

MPCC President Lalsawta chuan nimin khan Lunglei-a Congress Bhavan kumin atana hawnna hun hmanpuiin kumin 2023 MLA inthlan ah LDCC huamchhung MLA bial 7 lak vek theih an inrin thu a sawi a. “Ram siamthat hmanhmawh thlak zia hria ila, kan ram tan chauh Politics dik khel ila, tumahin Politician kan khel ve tur a ni lo,” tiin Party dangte anga sum tam tak hmanga Campaign an tum loh thu a sawi bawk.

ZPM Chhung Inkhawm nei

ZPM Party chuan nimin khan Aizawl-a an Party Office-ah Chhung Inkhawm neiin he hunah hian ZPM Working President K. Sapdanga chuan, “Kalphung thar mipui sawrkar din hi kan thupui ber a ni,” a ti a.“Tunah hian ram puma campaign beihpui thlak tumin ruahmanna siam mek a ni a, nasa takin kan bei dawn a. ZPM hi he inthlan lo awm turah hian an thawkrim ber a ni tih hi min hriat dan a ni tur a ni,” a ti bawk.

MNF President in thu sawi

MNF Party chuan nimin khan Aizawl-a Mizo Hnam Run-ah Chhung Inkhawm neiin he huna thu sawitu MNF President leh Chief Minister Zoramthanga chuan MLA inthlan lo awm tura tling leh turin Party dangte aiin advantage an nei tha zawk tih a sawi a. Finance enkawl thiam lova puhnate piah lamah sawrkar hlawh la tlai thin tih te sawifiahin, Central atanga Fund lokal pangngai bak pawisa lokal pui ber chu Share of Taxes a nih thu leh hei hi thla laihawla lo thleng a nih dan a sawi a. “A chang chuan kan loan lakte chu thla tirah Voice Record hmangin min rawn thing thin,” tiin heng karah hian hlawh pe in, loan pawh rulh zel a nih thu a sawi bawk.

MSU Pisa hawnna nei

Mizo Students’ Union (MSU) General Hqrs. chuan Aizawl-a an Office, MSU Pisa Pui chu kumin atana hawnna hun nimin khan an hmang a, he hunah hian MSU President Samuel Zoramthanpuia chuan, “Mizo hnam hmelma lian tak tak te chu hlawh hmuh nan chauha sawrkar hnathawk te, chhiah pe si lova hnamdang thurual puitu sumdawng te, ram tana rinawmna neilo Party Worker te an ni,” a ti a. Zofate dinhmun diktak leh Mizo Hnam kalzel dan tur ngaihtuah chunga khawvel hmun hrang hranga Zofate awmdan tichiang turin Preamble chhiarchhuahna leh sawrkar laipui hnena Memorandum theh-luhna chu tun thla, January ni 26 khian New Delhi-ah MSU in a neih tur thu a puang a. Mizo mipui zawng zawngte MSU hmalakna tawiawm tur leh Mizo Hnam dam nan hmun hrang hranga Zofate thlawpna a ngen bawk. MSU Pisa Pui hi Mizo mipuite tan Thawhtanni atanga Zirtawpni thleng hawn thin a ni anga, chawhma dar 10:00 atanga tlailam dar 4:00 thleng hawn thin a ni ang.

MPCB in thuchhuah siam

Mizoram Pollution Control Board chuan Ministry of Environment, Forests & Climate Change-in August 12, 2021-a thu a chhuah angin hman khat daih sarâng (Single Use Plastics) eng pawh siam, lâkluh leh hralhchhuah chu July 1, 2022 atangin khap a nih tawh thu leh 120 microns aia pan sarâng ip (Carry bags) te chu Dec. 31, 2022 atangin khap leh a ni ta bawk tih an tarlang a. Dân bawhchhia chu Environmental Protection Act, 1986-in a sawi angin an bungrua man sak, Environmental Compensation lâk leh an Industries khârsakte thlengin a hrem theih a nih thu an tarlang bawk.

2nd Bn. IR dincham lawm

Nimin khan 2nd IR Battalion, Khawzawl chuan an Battalion din champhaphak vawi 22-na chu Battalion Headquarters, Khawzawl-ah an lawm a, hun hlimawm tak an hmang a ni. 2nd IR Bn. hi January 15, 2001 khan din niin Commandant hmasa ber chu LT. Hrangchal MPS a ni a, State chhungah duty pawimawh tak tak a thawh piah lamah kum 2006-2008 khan Chhat-tisgarh-ah Naxalite hel te bei turin tirhchhuah an ni a, an zinga mi 10 lai chu ral kut tuarin an martar a ni. An Battalion dincham hi Pathianni ah a tlak avangin nimin khan a lawmna hun hi hman a ni a, tunah hian Ruatsanga Ralte MPS chu Commandant a ni mek a ni.

Ramri chungchang sawipui

Border Security Force (BSF) Mizoram-a Officiating DIG DP. Singh leh a thawhpui te chuan nimin khan Governor Hari Babu Kam-bhampati chu ramri venhimna kaihhnawih thil ah Raj Bhavan-ah an kawm a. BSF hotute hian Governor hnenah hian Mizoram (India) leh a thenawm ram – Myanmar leh Bangladesh te inrina laia ram venhim hna an thawh chungchangte Governor hi an hrilh a. Tunhnaia ramri hrula thil thleng leh venhimna an kalpui dan te pawh chipchiar takin an sawipui bawk a ni.

National Startup Day Mizoram Edition lawmna nei

Mizoram Sawrkar Planning & Programme Implementation Department hnuaia Mizoram Startup Mission (MSUM) bultumin nimin khan National Startup Day Mizoram Edition lawmna neih a ni.

I&PR Minister in Sevicing Centre a hawng

 Information & Public Relation Minister Lalruatkima chuan nimin khan Melthum-ah V. Lalbiakzama (BZA) Automobile TATA Servicing Centre a hawng a, Servicing Centre thar chu an customer te tan malsawmna leh lungawina thlen thin tu ni ngei turin duhsakna a hlan a ni. TATA Motors hi kum 1945-a din a ni a, motor ke pali nei chinah a te ber atanga lian ber bakah indo motor thlengin an siam a ni. A tirah chuan Rail engine siam chhuaktu an ni a, Commercial vehicle an siam hmasak ber chu kum 1954 khan Daimeir-Benz AG nen tangkawpin a ni.

International Year of Millet, 2023 lawmna bul tan

Mizoram Sawrkar Agriculture Department buatsaihin ‘International Year of Millet, 2023’ lawmna bul tanna hun chu nimin khan Aijal Club-ah Agriculture Minister C. Lalrinsanga hovin neih a ni.

‘Meichher’-a thu ziak tha te chawimawina hlan

Mizoram sawrkar School Education Department Thlakip chanchinbu ‘Meichher’ chanchinbu-a thu leh hla lam thawh thate chawimawina, Best Article of the Year leh Meichher Best Contributor of the Year semna chu nimin khan neih a ni.

Lirthei chesual-ah CADC-a MDC 2 boral

Nimin zing khawvar hma deuh khan Chawngte atanga Aizawl pana tlan Gypsy pakhat chu Aizawl luh dawn Trinity Hospital bul, Melthum quarry thlangah chesualin mi pathum an thi a, an zinga pahnih te hi Chakma Autonomous District Council (CADC)-a MDC nilai an ni.

Mizoram in Buhtun tharchhuah kawngah hma sawnin hmalakna kalpui zel a ni dawn

Agriculture Department Asst. Director Simon Rosangliana’n Mizoram chuan Buhtun tharchhuah tam kawngah hma a sawn zel niin a sawi.

Thuthar thehdarhtute hma ah Pathian Lalram thu sawi

Image
Inrinni kalta khan Er. R. Ramhlun-Edena chuan Serchhip Press Club-ah tualchhunga thuthar thehdarhtute kawmin Pathian Lalram thu, Indian Constitution atang leh Bible a Lal Isua zirtir dan te a sawifiah.

MASA Sub-Hqrs. hruaitu insiamtharna neih a ni

Mizoram Aero-Sports Association (MASA) Sub-Hqrs. Serchhip chuan Inrinni khan Bawngchawm Tlang-ah hruaitu insiamtharna an nei a, President-ah C. Lalhminghlua (Chhim Veng); Sr. Vice President-ah K. Laldaihvela (Bazar Veng); Vice President-ah Lalbiakdika (Bazar Veng); Secretary-ah Lalchhuana (Din-thar Veng); Asst. Secretary-ah Amos Lalfinga (Bazar Veng); Joint Secretary-ah R. Lalduhsanga (Tuikhuah Veng) leh Johny Lallawmkima (Bazar Veng); Treasurer-ah Lalnunsanga (Bazar Veng) leh Fin. Secretary-ah H. Lalchhuanawma (New Serchhip) te an ni.

Central YMA in sum hlan

Central YMA Executive Meeting in a lo rel tawh angin Gauhati High Court-in Riverine Reserved Forest (RRF) Notification thiahna thupek khinletna kalzel ah Central YMA chuan tunhnai khan Centre for Environment Protection (CEP) hnenah puihna Rs. 50,000/- a hlan fel a. CEP khinletna hi Gauhati High Court Chief Justice telna Principal Bench ah naktuk, January 17, 2023 (Thawhlehni) hian ngaihtuah leh a ni dawn a ni.

YMA kum 50 tlinna hmanpui

Sesawng Branch YMA chuan Inrinni khan an kum 50 tlinna, Golden Jubilee lawmna chu Sesawng Comminity Hall-ah buatsaihin Social Welfare Minister Er. Lalrinawma chuan khuallian niin a hmanpui a, YMA chu pawl tangkai tak, tanpui ngaite tanpuitu leh kan khawtlang a chhiatni leh thatni ah kan belh ber, Mizo nunze mawi leh hnam ziarang chawi nungtu an ni tih sawiin, YMA member-te chu mahni hnam nunphung leh ziarang te zahpui lo a chawinung zel turin a sawm bawk. Minister hian Golden Jubilee lungphun hawngin YMA Golden Jubilee Building pawh aa hawng nghal bawk a ni.