Lenkawl

Tun thla ni 18 atanga Salvation Army thalai khawmpui lian, India Eastern Territory (IET) Salvation Army Youth (SAY) Congress neih tur atan inbuatsaihna kalpui zel a ni.

National Legal Services Authority, New Delhi ruahmanna in Inrinni khan ramchhung hmun hrang hrangah National Lok Adalat thutkawm neiin Serchhip-ah pawh thubuai thahnem tak ngaihtuah leh a ni.

Baptist Church of Mizoram (BCM) New Serchhip Bial-a Thalai Kristian Pawl (TKP) inkhawmpui vawi 5-na chu nimin Pathianni hmang khan BCM New Serchhip Biak In-ah neih a ni. TKP New Serchhip Pastor Bial Inkhawpui vawi 5-na hi Zirtawpni zan atang khan neih niin thupui atan ‘Thlarau thianghlim nei rawh u’ tih chu hman niin Speaker atan Bialtu Pastor Rev. VL. Nithanga chu hman a ni a, Inrinni khan Rorel Inkhawm neiin an thurel zingah Bial huap-a thisen pek te, Unit tin ten Bible chhiar-chhuah leh Ruihhlo ngaite puala chawnghei tawngtai neih te a tel a ni. TKP New Serchhip Pastor Bial hi June 23, 2018-a din niin Unit 3 a awm mek a, Member mipa 197 leh hmeichhia 155, an vaiin 352 an awm mek a ni.

Nimin khan K. Hmingropuia (38), Serchhip Dinthar Veng chu boralin a Room tukverh atanga tla a boral nia hriat a ni. Thudawn danin Serchhip Dinthar Veng-a cheng K. Hmingropuia S/o K. Laikhuma hi a chesual lai tak hi hmu an awm lo chungin a tla ri ni ngeia hriat chu a bulhnaia awm ten hriain an buaipui nghal a, Serchhip damdawi In panpui nghal ni mah se chhan hman a ni ta lo a ni. K. Hmingropuia hi an In chhawng hnuai-a Room nei niin a Room-a tukverh-ah hian chesualin a tla ni ngeia hriat a ni a, a tlakna hi ft. 20 aia sang mah niin a hnuai hi Step awmna a ni a, hetah hian a Chal leh a Tukkhum bakah a nak te pawh a sawh nia hriat a ni. K. Hmingropuia ruang hi lumen a nih hnuah Vawiin hian vuiliam tur a ni ang.

UPC NEI hnuaia General PYD Conference Vawi 44-na chu nimin Pathianni hmang khan Khawzawl Zuchhip Field-ah neih a ni a, Inrinni khan rorel Inkhawm neiin kum 2024 General PYD Conferernce chu Lunglei-ah an nghat a, PYD kumpuan thupui atan kumin a thupuan hman lai ‘Thuthlung puan uar’ tih chu hman chhunzawm ni se an ti bawk. Tun tuma General PYD Conference hmang hian Serchhip atang pawhin mi engemaw zat an kal a ni.

Nimin tlai thleng khan Mizoram-ah Sample 19,90,023 enfiah tawh atangin COVID-19 hri kai mi 2,38,913 hmuhchhuah an ni tawh a, nimin khan hri kai chhinchhiah thar mi 2 awmin hri kai enkawl dam mi 3 an awm bawk a, hri kai zingah mi 2,38,148 te enkawl dam an ni tawh a ni. Heti hian nimin tlai thleng khan Mizoram-ah COVID-19 hri kai enkawllai mi 39 la awmin hri kai zingah mi 726 an boral tawh a, hri kai atanga chhutin 0.02 enkawl mek an la ni.

Inrinni kalta khan Siaha District-a Siata khua ah ‘Langnechhe Kut, 2022’ chu ropui taka hman a ni a, he hun hi Siaha DC Lalsangliana chuan khuallian niin a hmanpui a, Langnechhe Kut chu inremna ni a nih angin mitin te inrem tak leh hlim taka hun hmang theuh tura a duh thu a sawi a, “He Langnechhe Kut kan lawm hian Hnam intodelh leh Hnam taima kan nih zia a thar in min hriat nawm tir leh mawlh rawh se,” a ti bawk. Langnechhe Kut-ah hian Hnam lam chi hrang hrang entir niin zaithiam te an zai bawk a ni.

Naktuk November 15, 2022 (Thawhlehni) zing dar 9:30 hian Rashtriya Bal Swasthya Karyakram (RBSK), NHM, Mizoram leh Shija Hospitals & Research Institute, Imphal tang-kawp chuan Aizawl West DEIC, Kulikawn leh Kulikawn YMA Hall-ah te Congenital Heart Disease Screening Camp an buatsaih dawn a, he hunah hian a thlawnin nau piang hlim atanga kum 18 inkarte tan Lung lam hriselna chung-changah mi thiam rawn theihin an awm dawn a ni. RBSK puihnaa naupang Lung zai sak tawh check up ngaite pawh he hunah hian a inentir theih ang. Screening Camp-a lung zai ngai chhinchhiah te chu RBSK-in an inzaina a tum sak dawn a ni.

Mamit tlawha rawn zin Union Minister of State for Finance Dr. Bhagwat Karad chuan Zirtawpni khan thuthar thehdarhtute kawmin Mamit District chu District hnufual a nihna atanga khaichhuah chu sawrkar laipui tum ber a nih thu a sawi a, Hriselna, Zirna leh hmasawnna ruhrel din kawnga hmalakna chu an ngaih pawimawh a nih thu a sawi bawk. Union Minister chuan Mamit District a Health Sub-Centre 39 a Health Worker indaih lo lutukte, Zirna In hrang hranga zirtirtu indaihlo te chu a siamthat dan kawng zawn a nih tur thu a sawi bawk.

Zoram Thar Zofate Lairelna Inpui (NGO) in a buatsaih, Zofa Lelte 2022 chu Zirtawpni zan khan a hmawr bawk a ni a, Zenngaihsang, New Lamka, Manipur chu pakhatna niin, pahnihna Angeli Lalruatpuii, Chhingchhip leh pathumna Sonia Lamngaichin, Dumlian, Manipur te an ni. A buatsaihtute sawi danin, Zofa Lelte in a tum ber chu Kristaa Hnam inpumkhat a ni a, Zoram Thar Zofate Lairelna Inpui hruaitu Rev. Dr. Zaichhawna Hlawndo hla phuah ‘Tu dang kan nilo Zosefa tu leh fate kan lo ni’ tih chu Theme Song-ah hman a ni bawk. He intihsiakna hi kumin September thla atanga tanin Mizoram chhung District 10 bakah, Myanmar leh Manipur atangin an tel a. Pakhatna in lawmman ah cheng nuai thum, pahnihna in cheng nuai hnih leh pathumna in cheng nuak khat an dawng a, Top 10 (finalist) ten Rs. 10,000 theuh an dawng bawk a ni.

Mizoram-a rawn zin Union Minister of State for Finance Dr. Bhagwat Karad leh Chief Minister Zoramthanga te chu Inrinni khan Lengpui Airport-ah inkawmin Mizoram-a hmalakna pawimawh chungchangte an sawi dun. Union Minister leh Chief Minister inkawmna ah hian Mamit leh Mizoram pum-a mipui hriselna en-kawlna chungchang sawiin, ram hmasawnna leh Health Care a kal dun dan leh tih changtlun zawk nan mamawhna te an sawi dun a. Mizoram Medical College neih chhun enkawl zui zel dan tur te pawh an sawi a. Primary Health Centre-te tihchangtlun a, thuam that zel pawimawh a tih thu MoS hian a sawi bawk. Heng bakah hian Mizoram economy hmasawnna atana potential a neih – leilung nghenga eizawnna chu a hlawkna tak tak haichhuah tur chuan a panna kawng link road tha a tul thu te an sawi dun bawk.

Mizo Students Association Bangalore ten an buatsaih ‘Zirna Kutpui 2022’ chu Zirtawpni zan khan Tagore Hall, The United Theological College-ah Bangalore-a Mizo Zirlaite puala neih niin Mizoram Youth Commission (MYC) Chairman Dr. Vanlaltanpuia MLA chuan a hmanpui a ni. He hunah hian MYC Chairman chuan tun dinhmunah Bangalore chu India ram khawpui zingah Mizo zirlaiten an bawh nasat ber hmun a nih tawh avangin ram pawna Mizo zirlai chhuanawm ber berte an nih thu leh Mizoram hma thlir leh mi fakna ber an nih tak thu a sawi a, zirlaite chu tum nei leh thawhrim tak takna nen zirlaite chu bei tura fuihin, a bik takin tun dinhmun a Mizo te kan hniam falna em em, All India Service leh Central Service exam UPSC in a buatsaih thinah nasa leh zual a Mizo tihmingtha tura zir turin a fuih leh bawk a ni.

Nimin khan Health Minister Dr. R. Lalthangliana hovin Delhi-a Mizoram House Conference Hall-ah Zoram Medical College leh AIDS Healthcare Foundation (AHF), Los Angeles, USA te’n kumin September ni 27-a thawhhona thuthlung an ziah bawhzuiin thutkhawm an nei.

Union Minister of Road Transport & Highways Nitin Gadkari chuan Mizoram tan kawng siamna tur Project hrang hrang tan cheng vbc. 6,664 dah a nih tur thu a puang.

Foundation for Drug-Free Mizoram High Council Vawi 2-na chu Inrinni khan Aizawl-a Synod Conference Centre-ah neih niin he hun hi I&PR Minister Lalruatkima chuan khuallian niin a hmanpui a ni.

NHIDCL ten Four Lane an laih turah Mizoram chhung hmun thenkhat, Assam NHIDCL enkawlna hnuaia package an dah chu nimin khan MJA Kolasib District OB te chuan a hmunah an tlawh.

Tunhnaia Burma atanga dan lova ramsa lakluhte chu Aizawl Zoological Park-ah enkawl an ni a, heng ramsa te hi dahna mumal a awm loh avangin an thi nasa nia thudawn a ni.

Mizoram-a Chikungunya leng mek chuan ziaawm lam a pan lo mai ni lovin October thla chhung ringawt khan mi 40-in he natna hi an kai tih hmuhchhuah a ni a. Hetihlai hian October thla chhung khan Mizoram-ah Dengue hri kai hi mi 568 hmuhchhuah niin he hri kai zingah mi pathum an thi tawh bawk.

Serchhip Sub-Hqrs. YMA buatsaih Inter-Branch YMA Football Tournament nimin-a khelh zawh takah Serchhip Vengchung Branch YMA chuan Chhingchhip Venghlun Branch hnehin an champion ta.

Serchhip Sub-Hqrs. YMA buatsaih ‘Inter-Branch YMA Football Tournament 2022’ chu nimin khan khelh zawh a ni a, he Tournament kharna inkhawm chu Serchhip bialtu MLA Lalduhoma chuan khuallian niin a hmanpui a ni.