Lenkawl

Mizoram khawpui 23-ah Helicopter Service a awm laiin Serchhip-ah chuan hun engemaw chen Helicopter Service hi a awm tawh lo.

Kumin-a Mizoram State Anti-Tobacco Day lo thleng tur pualin nimin khan Serchhip District-a National Tobacco Control Programme (NTCP) chuan Govt. Bungtlang H/S-ah he ni pual hian hun an hmang.

Vawiin September 10, 2022 hi khawvel mahni intihhlumna thleng thin tihbona tura beihpui thlakna ni, ‘World Suicide Prevention Day’ (WSPD) a ni a, he ni pual hian Serchhip District-ah chuan nimin khan hun hman a ni.

Serchhip Town Joint VC te chuan nimin khan General Meeting neiin hruaitu thar thlanna an nei.

Nimin khan Serchhip District-ah COVID-19 hri kai mi 9 lai hmuh belh leh an ni.

MNF Party chuan nimin khan Aizawl-a an Party Office-ah Chhung Inkhawm neiin he hunah hian MNF Adviser leh Revenue Minister Lalruatkima chuan Assembly House a pharh tak ‘The Mizoram (Land Revenue) (Amendment) Bill, 2022’ chu mi retheite tana tha tur zawk a ni tih a sawi a, “The Mizoram (Land Revenue) (Amendment) Bill, 2022 kha thingtlang mi tan malsawmna a ni dâwn. LSC an duh reng, an neih theih loh kha Property card an nei anga, Property card hmangin Loan te a la thei tawh dâwn a ni. Tuna zangnadawmna lakna tur ho ah hian ‘cut’ a ni dâwn lo, thil kal mek a nih avangin. Thil lo la awm turah chauh ‘cut’ a ni dâwn,” tiin he Dan hi a sawifiah a ni.

Mizoram Pradesh Congress Committee (MPCC) chuan  Mizoram sawrkarin Boundary Committee a kalpui dan te, Meeting a ngaihtuah tur Agenda chhawpchhuah a nih dan te leh Assam nena ramri chungchanga inbiakna a sawrkarin Boundary Committee a ngaihthah leh si dan te an zirchian hnuin, Mizoram sawrkar hnuaia Boundary Committee hi tel zelna tlakah an ngai ta lo tih an sawi a, niminpiah, Sept. 8, 2022 khan Boundary Committee-a Member Secretary leh Commissioner & Secretary, Home Department hnenah ziaka an thlen thu leh nimin-a Mizoram sawrkar Boundary Committee thutkhawm ah pawh aiawh an in tirh loh thu an sawi a, Party chhunga Boundary Committee an neihsa hmanga ramri enzui an tum a ni.

Mizo Hindi Zirlai Pawl (MHZP) chuan CSS Hindi Teacher lâkah Recruitment Rules (RR) kalha ram leilung fa ni lo; Mizo tawng pawh thiam lo, trained an nih avang maia mi pahnih lak an nih chungchang Chief Minister leh Education Minister-te hnenah thlena August thla chhunga ban tura an ngenna ah tun thla ni 16 thleng sawrkar an nghak leh dawn tih an sawi a, heng mite hi ban an nih loh chuan an thiam anga hma an lak zel dawn thu pawh an sawi bawk.

Nimin khan Lawngtlai-ah District Bawrhsap Amol Srivastava hovin DC Office-a Officer-te leh School Education Department Official-te'n an District chhunga zirna dinhmun thlir hovin, zirna tihhmasawn dan tur kawng hrang hrang an sawiho a. Zirna tihhmasawnna kawng khat atan DC Office-a Officer-te'n Lawngtlai khawpui chhunga zirna In thlan bik nei theuhvin, zirna kawnga hma an sawn theih nan zirna In-a hotulu te leh Education Department hotute nen thawkho in a tul anga ngaihven, en zui leh kaihhruai ni se an ti a. Hemi atan hian kaihhruaina siamin Mid-Day Meal Cell te'n Shool-a chawchhun semte a khat tawka an endik thin theih nan Samagra Shiksha Addl. DPC in ruahmanna siam se an ti bawk.

National Mines Ministers’ Conference chu nimin atang khan Hotel Hyatt, Hyderabad-ah neih niin Mizoram atangin Commerce & Industries Minister Dr. R. Lalthangliana, Geology and Mineral Mining changtu ni bawk chu a tel a, he Conference hi Vawiin ah chhunzawm lehin zawhfel a ni ang. Ni hnih awh he Conference in a tum chu Sawrkar Laipui Ministry of Mines leh State Sawrkar ten leihnuai hausakna mineral zawn-chhuah leh laihchhuah kawnga thawhhona tha zawk neih leh kum 25 lo la awm turah Mineral Sector-a India hi Developed Nation a hlan kai a ni a. Nimin khan Ministry of Mines Subject thlurin, vawiin ah Ministry Coal Subject thlur a ni ang.

Mizoram-ah nimin tlai thleng khan COVID-19 hri kai enkawllai mi 323 an a awm.

Science Teachers' Association Mizoram (STAM) General Conference vawi 35-na chu nimin khan Aizawl-a Synod Conference Centre-ah neih a ni a, he hun hi Chief Minister Zoramthanga chuan a hmanpui a ni.

Mizoram State Boundary Committee thutkhawm vawi 4-na chu nimin khan an Chairman leh Deputy Chief Minister Tawnluia hovin neih a ni a, he thutkhawm ah hian Pawl leh Party hrang hrang aiawhte chuan ramri buaina chinfel a nih a, inremna neih thuai an duh tawh thu an sawi hlawm a ni.

Deputy Chief Minister Tawnluia chuan Maumual hmunah MNF Hnam Sipai Remna avanga lo haw te tan Inhmun 500 chuang siam a ni tih sawiin, Maumual ram neitute hnenah Compensation pek tawh anih thu House a hrilh.

Nimin-a Mizoram Legislative Assembly thutkhawm ah Revenue Minister Lalruatkima Bill putluh ‘The Mizoram (Land Revenue) (Amendment) Bill, 2022 chu Member ten an sawiho hnuah pass a ni.

Serchhip District-a lirthei neitu ten Pollution Test chungchanga harsatna an tawh mekah hun engemaw chen chu inhriatthiamna a kal tum a ni.

MHIP General Hqrs. President Ngurmawii Sailo chuan Saruak thlalak nena Social Media a inpholang thin hmeichhia te chu sim turin MHIP hmingin a ngen.

Nimin khan Serchhip District-ah African Swine Fever (ASF) vanga Vawk thi leh Vawk suat chhinchhiah a awm belh lova, ASF rinhlelh Vawk thi leh suat chhinchhiah a awm belh lo bawk a ni. Heti hian kumin chhungin nimin thleng khan Serchhip District-ah ASF vanga Vawk thi chu 297 niin Vawk 389 suat a ni tawh bawk a, ASF nia rinhlelh Vawk thi 26 awmin Vawk 134 suat a ni tawh bawk a ni.

Govt. Serchhip College chuan nimin khan ‘International Literacy Day’ pualin an College-ah hun an hmang a, he hun hi H. Lalchhanhima, Programme Officer, NSS Unit chuan kaihruaiin Resource Person PC. Vanlalruati, Asst. Professor, Dept. of Education chuan he Ni hman chhan leh Literacy in mihring nuna a tha zawnga nghawng a neih theih dan te a tarlang a ni.

Keitum leh Khawlailung inkara Tuichang Lei dawh hna thawktu Company ten hna zawh hun tur pawhsei an dilna chu ngaihtuah mek a ni.