Lenkawl

Serchhip-a Fisheries Department chuan an Department hnuaia ‘Family Orinted SEDP’ atanga tanpuina dawng turte chu nimin khan kokhawmin ‘Beneficiaries Register’ ah an hming an ziah tir a, Sangha khawi dan zirtirna an pe nghal bawk.

PHE Department changtu Deputy Chief Minister Tawnluia chuan nimin-a Assembly inkhawm ah Serchhip bialtu MLA Lalduhoma zawhna chhangin Thenzawl Vanva Dam atan NABARD sum Rs. 511,96,000/- ruahman a ni tih sawiin, Physical-ah 88% leh Financial-ah 91.71% zawh a nih tawh thu a sawi a. He hna hi kumin December thla ah zawh tum a nih thu leh kum 2041 thleng nitin mi pakhat tan tui litre 50-a chawm thei tur a nih thu a sawi bawk.

P&E Minister R. Lalzirliana chuan Serchhip a 6.3MVA, 132/33kV Transformer leina turin Tender tihfel a nih tawh thu nimin-a Assembly inkhawm ah Serchhip bialtu MLA Lalduhoma zawhna chhangin a sawi a, State Purchase Advisory Board (SPAB) approve turin ruahman mek a nih thu a sawi bawk. Serchhip Mat phai a Transformer te chi 11, NABARD hnuaia dah tum chungchanga Serchhip bialtu MLA zawhna pawh chhangin P&E Minister chuan hnathawhna tur bungrua engemaw zat a hmunah dah tawh a ni tih a sawi a, “Fund allocation pawh hmuh ni tawhin Expenditure Sanction (ES) dil mek a ni a, kum hnih (2) chhunga zawhfel tura ruahman a ni,” a ti bawk.

Health Minister Dr. R. Lalthangliana chuan Serchhip District Hospital sakna tur chungchang ah CSR atanga pawisa kan hmuh anih angin tih ran a tul thu a sawi.

Serchhip District-ah nimin khan ASF vanga Vawk thi pakhat awm belhin District pumah Vawk suat 26 zet a awm bawk.

Serchhip District-ah COVID-19 hri kai enkawllai an tlem ve hret hret zel a, nimin tlai thleng khan hri kai enkawllai mi 9 an awm a ni.

Home Minister Lalchamliana chuan Sawrkar in a chhinchhiah danin Mizoram chhunga District 11-ah Myanmar raltlan 30,401 an awm mek tih Assembly inkhawm neih mekah VL. Zaithanzama zawhna ziaka a chhanna ah a tarlang a, heng zingah hian mi 30,177 te chu Identity Card siam sak an nih tawh thu leh ID siam chu an zawh thawkhat tawh thu a sawi bawk.

PC Party OB Meeting nimin-a neih chuan an Party Acting President atan Sr. Vice President nilai Vanlalruata chu an ruat. PC Party President nilai Lalhmangaiha Sailo chuan thalai zawk tan a nihna a ken thu leh Sr. Vice President nilai kut-ah an party hruai hna a hlan thu tun thla ni 5-a a puan tak avangin nimin khan PC Party hian Aizawl-a an Party Office-ah OB Meeting an nei a, lungrual takin Acting President atan tuna Sr. Vice President nilai Vanlalruata an ruat thu hi an puang a ni.

Nimin khan Lunglei-ah District Level Monitoring Committee on Prime Ministers Employment Generation Programme (PMEGP) Scheme chu thukhawmin he hunah hian Manufacturing Unit Project cost cheng nuai 25 ni thin chu cheng nuai 50 ah tihsan a nih thu leh Inservice Unit Project cost cheng nuai 10 ni thin pawh cheng nuai 20 a tihsan anih thu tarlan a ni a. Hei bakah hian PMEGP-ah Scheme thar Transport Activities (Taxi, Auto Ricshow) permit nung te tan a dil theih bakah Ar vulh, Bawng vulh, Sangha dil siam, khuaikhawi leh pangang khawitute tan pawh loan a dil theih thu tarlan a ni bawk.

Niminpiah-a Mizoram hmun hrang hranga Village Council by-election neih chu tluang taka zawhfel a ni ta a,

Nimin tlai thleng khan Mizoram-ah COVID-19 hri kai enkawllai mi 319 an la awm.

India rama Sahuan ten ramsa inthleng tawn (Animal exchange programme) an kalpui thin angin, Aizawl Sahuan-a ramsa 15 te chu Indira Gandhi Zoological Park (IGZP), Vishakapatnam-ah pek an ni.

Health Minister Dr. R. Lalthangliana chuan Mizorama Health Sub Centre zawng zawng bakah PHC leh UPHC chu Sawkar kum kal mek chhunga upgarede vek hman tum a ni tih a sawi.

Nimin-a Mizoram Legislative Assembly Session zawhna leh chhanna hunah zawhna pathum chauh zawh hman a ni a, Home Minister Lalchamliana'n zawhna leh chhanna hun chu hlawk zawka hman a nih theih dan tur member ten an ngaihtuah tlan tha a tih thu a sawi.

Health Minister, Dr. R. Lalthangliana'n tunah hian Mizoram-ah Doctor Post ruak 67 a awm mek tih Assembly House a hrilh a, Mizoram-a Doctor indaih lohna zualpui chu ZMC-a MBBS zirlaiten an zirchhuah hunah a ziaawm theih beisei a ni tih a sawi bawk.

Serchhip District-a Khawlailung khua ah nimin thleng khan ASF vanga Vawk thi la awm belh zelin nimin khan Vawk thi pakhat a awm leh a, Vawk puitling niin khaw dang-ah ASF vanga Vawk thi leh suat a awm belh lova, hetihlai hian nimin khan Leng khua ah ASF nia rinhlelh Vawk 6 lai chu suat leh a ni bawk. Heti hian nimin thleng khan Serchhip District-a ASF vanga Vawk thi chu 296 a tling tawh a, Vawk 384 suat ni tawh bawkin ASF hri lenna ni lo khaw dang ah Vawk thi 26 leh Vawk suat 113 a awm tawh bawk a ni.

Nimin khan Serchhip-ah ni 3 chhung awh tur Electric Wiring Training chu neih tan niin mi 44 ten training nei turin an hming an pelut a ni.

Serchhip District Bawrhsap Nazuk Kumar IAS chuan nimin khan Serchhip District Hospital tlawhin Mizoram State AIDS Control Society (MSACS) hnuaia thawktute hnathawh hrang hrang a enfiah a, District Medical Superintendent leh thawktu dang ten lo dawng-sawngin hnathawktute chu an hnathawh dan hrang hrang a zawtfiah a, thawktute pawhin an mamawh leh harsatna an neih te lo thlenin, Bawrhsap pawhin a theih anga hma a lak pui tur thu thawktute hi a hrilh a ni.

Serchhip District chhung Baktawng VC-a Hmeichhia te tana Seat hauh ruah hnawhkhat tura inthlanna neih ah ZPM Candidate Lalthanpuii chu thlantlin a ni.

PHE Department in Serchhip khawpui chawmna atana Tuikum lui tui an pump-na Electric khawl chu a chhiat avangin mipuite hnena Tui semchhuah kawngah harsatna a thleng mek.