Lenkawl

Mizoram Wrestling Association buatsaih 5th Inter-District Wrestling Championship leh Mizo Inchai-a Mizoram champion te cho thei tur zawnna chu Vawiin hian Serchhip Indoor Stadium-ah neih tan a ni dawn a, he inelna a tel tur infiammi te pawhin nimin khan Serchhip an rawn thleng tawh a ni. He intihsiakna hi chawhma dar 11:00-ah neih tan a ni anga, chawhnu dar 1:00-ah a hawnna neih a ni thung ang.

Mizoram Board of School Education (MBSE) chuan kumin-a pawl 10, High School Leaving Certificate (HSLC) Exam result chu nimin khan tichhuakin Exam hmachhawntu zirlai 17,417 atangin mi 12,304 in hlawhtlinna an chang a, Exam beitu atanga chhutin za zela 70.64 te chu an pass a, zirlai Fail vekna School 15 a awm bawk.

Serchhip-a Petrol Pump-ah Petrol lak tur awm mumal tawh lovin Diesel erawh Vawiin ah rawn thleng tura beisei a ni.

Foundation For Drug-Free Mizoram chuan niminpiah khan Chhiahtlang-a Adult Rehabilitation Center-ah ruihhlo thatloh zia inzirtirna hun an buatsaih.

Nimin khan Serchhip District-ah COVID-19 hri kai mi 3 hmuh belh niin an vaiin Serchhip khua vek an ni.

Serchhip Thalai Pawl (STP) chuan thalai te ruihhlo laka an him theih nan leh Serchhip bula Tuikum leh Mat lui humhalh turin hmalak an tum.

Serchhip District chhunga awm Mualcheng Games & Sports Association chuan kum 6 leh 16 inkarte tan Football Academy dinin nimin atang khan training neih tan a ni.

Central Warehousing Corporation in Corporate Social Responsibility hnuaia cheng nuai 20 senga an sak Aizawl PHC-a Makeshift Covid Care Centre chu nimin khan Aizawl DC Dr. Lalhriatzuali Ralte chuan a hawng a, hemi atana sum petu Central Warehousing Corporation chungah lawmthu sawiin, he building hi Covid natna awm tawh loh hnuah pawh Health Department in natna inkai chhawn awlsam (infectious disease) enkawl nan, Isolation Ward atan a hman theih nghal tura ruahman a nih thu a sawi bawk. Makeshift Covid Care Centre hi a dung ft. 47 leh a vang ft. 17 niin chhawng hnih (2) a ni a, damlo mi 40 vel lenna a ni.

 BJP Mizoram Pradesh Kisan Morcha chuan nimin khan thuchhuah siamin Mizoram-a Dawnfawh chingtute chuan an tharchhuah hralhna awm mumallo leh Rate hniam chungchang ah harsatna namenlo an tawk mek tih tarlangin, Mizoram sawrkar chuan State pawn leh ram pawn atanga Dawnfawh leh Tomato lakluh khap nghal tura rang taka Order tichhuak a; Trade & Commerce Department leh Agricultural Marketing lam enkawltuten hma an lak nghal loh chuan Kuthnathawktu Farmers te tan Protest Action an kalpui nghal dawn tih an sawi a. Mizoram loneitu ten mahni chhungkua leh ram intodelh nan nasa takin hna an thawk mek tih an sawi bawk.

Mara Autonomous District Council (MADC) inthlanna neih zawh a nih hnuah Vawiin hian MADC Chairman thlanna neih a ni dawn a, nimin tlai thlenga Nomination Paper thehluh theih hun hawn ah MNF leh INC Joint Legislature Party atangin N. Viakhu (Siaha South-I) leh BJP atangin  N. Zakhai (Amobyu) ten Nomination Paper an thehlut a ni.

Mizo Students’ Union (MSU) General Hqrs. Mizoram Board of School Education (MBSE)-in High School Leaving Certificate (HSLC) 2022 result a tichhuak chu lawmawm an tih thu sawiin, kum hmasa aia result tlahniam chu pawi an tih rualin COVID-19 hri lengin zirlai leh zirtirtute nasa taka min nuaina karah 70.64% lai pass percentage kan nei erawh lawmawm an tih thu an sawi a. HSLC result 2022-a sawrkar enkawl School 8 lai mai Failed vek kan nei chu ngun taka an chhui nghal thu leh a chhan lian ber zingah zirtirtu indaihlohna a nih laiin School thenkhatah chuan zirtirtu inthlahdah vang a ni tih a hriatin pawi an ti takzet tih an sawi bawk.

India hmarchhak State-a Rural Development Department Minister te tana buatsaih ‘Regional Review Conference - Ministry of Rural Development’ chu nimin khan Assam Administrative College, Guwahati-ah neih niin Mizoram atang pawhin RD Minister Lalruatkima chu a tel a, he hunah hian MGNREGA, PMAY-G, NRLM, DDU-GKY & RSETI, PMGSY leh a dangte a hmalakna sawiho niin State tin te hmalak mekna leh hmachhawp te sawihona leh thlirhona pawh neih a ni. He hunah hian Lalruatkima chuan Ministry of RD hnuaia kawng hrang hranga Mizo-ram Sawrkarin Central Sawrkar duhsakna a dawn chungchangah leh hmalakna tur Fund tha taka a pek thin avang te pawhin lawmthu a sawi a, Rural Development Department hnuaia Mizoram mamawh hrang hrang te a thlen nghal bawk.

Nimin tlai dar 5:00 thleng khan Mizoram-ah COVID-19 hri kai enkawllai mi 244 an la awm.

Mizoram-a Vawk hri leng mek, African Swine Fever (ASF) vangin Champhai leh Mamit District-ah Vawk thi ala awm belh zel a, nimin thleng khan Champhai District-ah hian ASF vanga Vawk thi 1775 awm tawhin Vawk 1825 te chu suat a ni tawh bawk a, ASF kaihhnawih avanga kumin chhunga Vawk thi hi 3600 a tling tawh a ni. ASF vang hian Mamit khawpui chhungah pawh nimin thleng khan Vawk thi ala awm belh ve zel bawk a, new Mamit-ah ringawt Vawk thi 88 awm belh leh tawhin Vawk thi te hi Vawkpui leh Vawk railai te an ni tlangpui tih kan thudawnna chuan a sawi bawk a ni.

Jal Jeevan Misson (JJM) 2020-2021 sum cheng nuai 93.50 senga siam Dilkawn Water Supply Scheme leh cheng nuai 25.07 senga khawchhung In tina tui connection pekna, Functional Household Tap Connection (FHTC) chu nimin khan Environment Forest & Climate Change (EF&CC) Minister TJ. Lalnuntluanga chuan a hawng.

ZPM Party chuan kan ram hmasawnna hnathawh in kan leilung leh nungchate tana thil tha lo a thlen chu pawi an ti takzet tih an sawi.

Mara Autonomous District Council (MADC) inthlanna neih zawh a nih hnuah Indian National Congress (INC) leh MNF te tangdun chuan sawrkar an siam dawn ta niin a lang a, hemi chungchang ah hian he inthlanna a Seat la Party pathum te ngaihdan a inang lo hle.

Mara Autonomous District Council (MA-DC) Chairman thlan hun atana May 18, 2022 ruat a nih hnuah MNF Party leh Congress Party te chuan sawrkar in\awm siam an tum niin a lang ta a, MNF leh INC hian Joint Legislature Party dinin CEM atan H. Malvina (INC, Phura Bial) a ni anga, Dy. CEM atan H.C. Lalmalsawma Zasai (MNF, Amotlah Bial) niin Chairman-ah N. Viakhu (MNF, Siaha South Bial) a ni thung anga, hei bakah hian Congress Party hian Executive Member (EM) pathum leh Nominated Seat pakhat an chang dawn nia thudawn a ni.

Mizoram-ah Arvind Kejriwal-a kaihhruai Aam Aadmi Party (AAP) ruangam din tan a ni a, kumthar a Mizoram Legislative Assembly inthlanpui lo awm turah Candidate neia inthlan an hmachhawn nghal dawn leh dawn loh erawh an sawi chiang ngam rih lo.

Nimin zing dar 7:00 khan Hrangchhungi (100), Serchhip Venglai chu Lungna avangin a boral a, nimin vek khan vuiliam nghal a ni. MUP District Hqrs. Serchhip President, CL. Ramngaia chuan an chhinchhiahna atangin Hrangchhungi chiah hi Serchhip District-a kum 100 dam an neih a ni tih LENKAWL hrilhin kum 100 dam chawimawina an hlan thin dawng hman lova a boral chu an ui hle tih a sawi bawk. Hrangchhungi hi kan Joint Editor ni mek R. Zangura nu niin Serchhip Sub-Hqrs. YMA President nilai Kawlthuama nu a ni bawk.