Nizan hmasa dar 9:45 khan Lalchuailovi (86), Serchhip Leisang Veng chu DCHC, Ser-chhip-ah boralin nimin khan vuiliam a ni. Thudawn danin Lalchuailovi hi tunhnai khan a chetsual palh avangin a ruh a tliak a, Serchhip damdawi In-a enkawl a nih hnuah Oct. 2, 2021 khan COVID-19 a kai tih hmuhchhuah a ni a, hemi ni vek hian DCHC Serchhip-ah hian dahluh nghal niin nizan hmasa khan a boral zui ta a ni. Lalchuailovi ruang hi lumen a nih hnuah nimin khan vuiliam a ni.
AH&Vety Department leh FOCUS Serchhip District te hmalakna in Serchhip District-a Vawkpui vulh tur mi 10 te hnenah nimin khan Vawk chaw channa khawl sem niin Vawk chaw siam dan zirhona neih nghal a ni a. He hunah hian Serchhip District-a ran chaw siamchhuak tura hmalakna kal mek chu peihfel tep a nih thu tarlan a ni.
Nimin khan Serchhip District-a khaw pahnih ah African Swine Fever (ASF) vangin Vawk thi pahnih a awm leh a, heng te hi Khawlailung leh Sialsir khua ah pakhat ve ve niin heng te nen hian Serchhip District-a ASF vanga Vawk thi chu 3772 a tling tawh a, nimin-ah Vawk suat a awm belh lo thung a ni. Serchhip District-ah hian ASF vangin khaw 35-ah Vawk a thi tawh a, Vawk thi leh suat tamna ber Thenzawl khua ah chuan 921 zet thi tawhin Vawk 615 zet suat a ni tawh bawk a ni.
Tunhnaiah Serchhip District-a Khawbel khua ah COVID-19 hri kai hmuhchhuah thahnem tak awmin nimin khan bialtu MLA leh Assembly Deputy Speaker Er. Lalrinawma chuan Khawbel khua hi a tlawh a, VC leh VLTF te nen inkawmna an nei.
Niminpiah khan Mizoram-ah Sample 9422 enfiah leh niin heng atang hian COVID-19 hri kai 1430 hmuhchhuah leh an ni a, Sample enfiah atanga za zela 15.81 te chuan hri an kai a ni.
UNICEF in ICMR kaltlanga Mizoram-a RT-PCR khawl a rawn pek chu District Hospital Champhai-a hman turin nimin zing khan Champhai South bialtu MLA leh Law Minister TJ. Lalnuntluanga chuan Champhai District Hospital hotute hnenah a hlan.
Seling atanga Champhai panna kawng, NH. 6 laih mekah mi thenkhat ten Puilo ram-a hnathawktute an hnathawh tihtawp tura an tih hnuah nimin khan Khawzawl DC CC. Lalchhuangkima chuan Puilo ram a Dhariwal Buildtech Limited (DBL) Camp-ah NHIDCL aiawh, Kawlkulh leh Dulte Joint Action Committee for NH-6 leh Dulte Economic Growth & Development Committee hruaitute a kawm.
Electors Photo Identity Cards (EPICs) leh Election Notice-te Speed Post hmanga rang taka thawnchhuah a nih theih nan Chief Electoral Officer, Mizoram leh Department of Posts (DoP), Mizoram te chuan nimin khan thawhhona thuthlung an ziak.
Lirthei chetsualna a lo awm thulha chetsualna a lo thlen dan leh a thlen chhan te kimchang takin hriat theihna tur Integrated Road Accident Database (iRAD) Project chu chu nimin khan Home Minister Lalchamliana chuan a hawng.
Serchhip District-a AH&Vety Department leh FOCUS ten hma an lakna hnuaia Vawk vulh thlangtute hnenah Vawiin hian ran chaw channa khawl hlanna hun hman a ni dawn a, chawhnu lamah heng khawl dawngtute tan hian khawl hman dan leh ran chaw up that dan zirhona neih nghal a ni bawk ang.
Vawk hri leng, African Swine Fever (ASF) chu Serchhip District-a ziaawm chho viau mah se Vawk thi ala awm belh zel a, nimin khan khaw 4-ah Vawk thi 13 lai awm belh leh a ni. Nimin a ASF vanga Vawk thi 13 zinga 8 hi Sialsir khua ami te niin Chhuanthar Tlangnuam leh Khawlai-lung-ah Vawk pahnih ve ve a thi a, Thentlang khua ah Vawk thi pakhat a awm bawk a ni. Heti hian nimin thleng khan Serchhip District-a ASF vanga Vawk thi chu 3770 a tling tawh a ni.
Niminpiah Oct. 10, 2021 kha ‘World Mental Health Day’ niin he ni hi Pathianni a nih avangin Serchhip-ah chuan Zirtawpni khan he ni pual hian hun hman a ni.
Nimin October 11, 2021-a International Girl Child Day lawmna chikhat atan Serchhip District District Hospital-a nau piang thar hmeichhia te hnenah lawmpui thilpek hlan a ni.
Pathianni khan Mizoram-ah Sample 1246 enfiah niin heng atang hian COVID-19 hri kai mi 307 hmuhchhuah an ni a, hri kai hmuhchhuah hi tlem mah se Sample enfiaha tanga chhut chuan za zela 24.64 in hri an kai a ni.
Dedicated COVID Hospital, Zoram Medical College (DCH-ZMC)-a khum 10 awmna Intensive Care Unit (ICU) Ward thar chu nimin khan Health Minister Dr. R. Lalthangliana chuan a hawng.