Lenkawl

Nimin khan Chief Minister, Zoramthanga hovin Mizo thalaite zinga mahni kutkawih eizawnna, Entrepreneurship lama hma an sawn theih nan hmalakna thar siam belh chungchang sawihona neih niin Mizo thalaite zinga mahni kutkawih, mahni hmangchang hriatna hmanga eizawnna nei thei tura thalaite dinhmun zirchianna chu thlirho a ni bawk.

Sawrkar ruahmanna anga zirna In sang then-khat hawn a nih dawn tak avanga Hostel-a awm tur Rapid Antigen Test (RAgT) nei duhte tan Vawiin chawhma dar 10:00 atang hian CMO Conference Hall-ah test theih a ni dawn a, test man Rs. 500/- zel tur a ni ang.

Serchhip District Magistrate, Kumar Abhishek chuan Section 144 CrPC 1973 in thuneihna a pek angin Serchhip District chhunga mipui vantlang nun a lo zalen a, kan lo hrisel zawk nan mi tumah in khawlai-ah Ui an chhuah tur a ni lo tih thupek a chhuah a, Ui vulhtu ten khawlai ah len chhuahpui an duh chuan thlungin an kai tur a nih thu leh Ui te hi khawlaiah leh mi In kawtah ek tir loh tur niin, a neituten an Ui ek te bawlhhlawh bawm-ah an paih vek tur a ni tih a tarlang bawk. He thupek zawmlo te chu Sec. 188 IPC hmangin hrem an ni anga, Oct. 13, 2020 atanga thla hnih (2) chhung a huam ang.

Darkar 24 kalta chhungin Serchhip District-ah COVID-19 hri kai hmuhchhuah thar leh hri kai enkawl dam awm an awm lova, Serchhip District-a hri kai hmuhchhuah zingah za zela 93.84 te chu enkawl dam an ni tawh.

Kar kalta Ningani chawhnu lama Serchhip leh Vanchengte inkar Tuikum lui-a chesuala tui a tla, Lalngaihdami (14) D/o K. Chanchinmawia, Serchhip IOC Veng chu Mizo dan a ni 7 zawn a nih hnuah a ruang pawh hmuh a nih tak loh avangin nimin khan khawtlang huapa zawn hna thawh chu tihtawp a ni ta a, nimin tlai dar 4:00 khan a chetsualna hmun, Tuikum lui-a Vanchengte kai leh an zawnna hmun, Hriang-tlang kai-ah te hunserh hmangin tui tla zawn hna hi tihtawp a ni a, Vawiin chawhma dar 11:00 hian an chenna In-ah Kohhran lamin a thlahna puala hunserh an hmang ve leh ang.

Serchhip District Academy of Letters (SE-DAL) chuan nimin khan an dinchampha lawmin an member te lehkhabu buatsaih pahnih chu an tlangzarh nghal bawk.

Serchhip District pawnlam atanga COVID-19 hri kai hmuhchhuah, Serchhip District-a enkawl tura rawn dah mi 247 te chu enkawl dam vek niin anmahni enkawlna hmun atanga chhuahtir an ni tawh a, Serchhip District-a hri kai enkawl dam zawng zawng chu 308 an ni tawh.

Sangha fuan rut lo turin chah

Mizoram-a COVID-19 hri kai enkawllai chu mi za aiin an tlem ta a, hri kai hmuhchhuah atanga zaa 95.54 te chu enkawl dam an ni tawh.

Lawngtlai West bialtu MLA, C. Ngunlianchunga chuan nimin khan Mizoram State Cancer Institute, Zembawk in a tul apianga an hman tur lirthei ( Van motor) chu MLA Fund atangin a pe.

Land Revenue and Survey Board chu nimin khan Revenue Minister, Lalruatkima hova thukhawmin Board hmalakna hrang hrang an thlirho.

Mizoram-a Public Health Engineering (PHE) Department hotute chuan nimin khan Chief Minister, Zoramthanga hovin Mizoram-a Jal Jeevan Mission (JJM) kalpui mek chungchang sawihona neiin PHE Department changtu Deputy Chief Minister, Tawnluia pawhin he hun hi a hmanpui a ni.

Health Minister hovin rel

New Delhi-a cham mek Rajya Sabha MP, K. Vanlalvena leh Lok Sabha MP, C. Lalrosanga te chuan nimin khan Union Finance Minister, Nirmala Sitharaman-i chu a Office-ah hmuin Chief Minister, Zoramthanga'n HUDCO Loan ba, cheng vbc. 39.29 ngaihdam dilna a lo thawn tawh leh Phone hmanga alo sawipui tawh chungchang an bawhzui.

Mamit District Bawrhsap, Dr. Lalrozama IAS kaihhruaina in nimin khan Mamit DC leh Karimganj DC, Anbamuthan MP te chuan Kanhmun BNRGSK Hall-ah Assam leh Mizoram inrina chungchang sawiin inkawmna an nei.

Niminpiah-a Mizoram-a Sample enfiah zingah COVID-19 hri kai mi 10 hmuhchhuah belh leh niin Mizoram-a hri kai hmuhchhuah chu 2212 an tling tawh.

Zuangtui atanga Mizoram chhimlam Eng pekna tur, 132kV Single Circuit Transmission Line Melriat chu nimin khan P&E Minister, R. Lalzirliana chuan hawngin nimin vek khan Lunglei-ah he Line thar lawmna hi neih a ni bawk.

Serchhip bialtu MLA, Lalduhoma chuan nimin zing khan Serchhip Sub-Hqrs. hruaitute nen Ningani kalta-a Tuikum lui-a chesual Lalngaihdami zawn hna thawk mektute chu an tuitla zawnna hmunah a tlawh a, bialtu MLA chuan tuitla zawngtute inpekna leh tlawmngaihna chu fakawm a tih thu sawiin, vanduaina tawktu chhungte a tawrhpui thu a sawi a. Tui tla zawnna atana a tul anga hman turin Serchhip Sub-Hqrs. YMA kutah Rs. 8000/- pein hemi hmalam hian Rs. 2000/- a lo pe tawh bawk a, Tuitla zawn hna thawktu Hriangtlang YMA te pawh Rs. 2000/- a pe bawk. Serchhip bialtu MLA, Lalduhoma hi Tuirial bialtu MLA, Andrew H. Thangliana chuan rawn tawiawmin Andrew H. Thangliana hian Serchhip Sub-Hqrs. YMA hnenah hian tuitla zawnna atana an hman turin Rs. 2000/- a pe ve bawk a ni.

Ningani kalta a Tuikum lui-a tla, Lalngaihdami chu nimin thleng khan khawtlang in la zawngin Vawiin thleng khawtlang huapa zawn hna hi thawh a ni ang.

Serchhip Nursing School CCC-a BSF Sipai hri kai enkawl zawng zawng chu enkawl dam niin hri kai enkawl dam hnuhnung ber chu nimin khan a enkawlna hmun atang hian chhuahtir a ni.