Lenkawl

Mizo Students’ Union (MSU) General Hqrs. chuan Mizoram chhunga dan lova khaw din hrang hrangte tihtawp anih theih nan leh Dan lova khaw din a sawrkar leh Kohhran lam ten hma-sawnna ruhrel (Infrastructure Development) an tih thin chu tihtawp anih theih nan nasa taka hma an lak thin thu sawiin, Nov. 22, 2019-a LAD in dan lova khaw din zawng zawnga hmasawnna ruhrel siam tawh lo tura thupek a siam chu lawm-awm an tih thu an sawi bawk.

Association for Environmental Preservation (ASEP) chuan nimin khan Pachhunga University College Seminar Hall-ah General Assembly, 'Nungcha hmangaihtute inkhawmpui' tia vuah chu a vawi 15-na atan an hmang leh a, he hun hi Home Minister leh ASEP Patron, Lalcham-liana chuan hmanpuiin kumtina tih thin dan angin chawimawina semchhuah a ni a, ASEP chawi-mawina sang ber, 'ASEP Nopui' chu Haulawng khua hnenah hlan niin, Environment humhalhna kawnga thlalak hmanga theihtawp chhuahtu mi pariat (8) te hnenah Environmental Photographer chawimawina pek a ni bawk.

Mizoram Secretariat Service Association (MSSA) chuan nimin khan Aizawl-ah General Conference vawi 15-na hmangin Deputy Chief Minister, Tawnluia chuan khuallian niin a hman-pui a, Mizoram Secretariat Service hnathawkte chu Sawrkar neitu an nihna lai te sawiin, sawrkar thil pawimawh tak takah a bultumtu an nih thu a sawi a. Sawrkar hna chu hlawh lakna atan chauha ngai lovin an thawh chhan ber chu mipui tana rawngbawl a ni tih chu hre reng turin a chah bawk. Hei bakah hian Deputy Chief Minister chuan Sawrkar hnathawk reng reng tan Sawrkar ah a neitu nihna ‘Sense of ownership’ neih a pawimawh thu pawh sawiin, mi rin kai leh rinawm ‘integrity’ neih a tul thu leh mahni inthunna in zahawmna a ken tel thu te pawh a sawi bawk.

Nimin khan Planning & Programme Implementation Department hnuaia Entrepreneurship Development Centre (EDS) buatsaih Mizoram State Outstanding Entrepreneurs’ Award sem a ni a, Home Minister Lalchamliana chuan khual-lian niin a hmanpui.

Mizoram Presbyterian Kohhran chuan nakum 2020-a ‘Nilai leh Beihrual Thupui’ leh ‘Puitling Sunday School zirlaibu’ tur chu a tichhuak ta a. Heng lehkhabu pahnihte hi Mizo lehkhabu malkhai ah chuan copy chhutchhuah tam berte an ni.

Zoram Peoples’ Movement (ZPM) Tuikum Block chuan nimin khan Khumtung Community Hall-ah Block Conference vawi 1-na hmangin Lalduhoma, MLA bakah ZPM hruaitu dang ten an hmanpui.

MNF Party chuan nimin khan Aizawl-a Mizo Hnam Run-ah Chhung Inkhawm neiin an Party General Hqrs. hruaitu atana thlan thar ten thu an sawi.

AYUSH MZP Inter-High School Quiz 2019 chu nizan hmasa khan zawhfel niin St. Pauls Higher Secondary School chu pakhatna an ni.

Mizoram Pradesh Congress Committee (MPCC) chuan nimin khan Aizawl Vanapa Hall kawt-ah BJP kaihhruai sawrkarin kaltlangpui a tum mek, Citizenship Amendment Bill, 2019 dodalna hun an buatsaih.

Nimin Nov. 29, 2019 kha Presbyterian Kohhran-a ‘Kohhran Hmeichhia’ dinchampha, Kohhran Hmeichhe Ni’ a ni a, he Ni hi Kohhran hrang hrangah urhsun taka hmangin Serchhip-a Kohhran tam ber te chuan chhun lamah inkhawm neiin hun an hmang a ni.

X Serchhip Bazar Veng-a cheng, K. Lalhriat-zuala (Mapuia) s/o K. Chawiliana chuan nizan hmasa khan Serchhip Kawnpui South Branch YMA te hnenah Close Circuit Television (CCTV) Set kim (channel 8) chu a pe a, hei hi Serchhip Bazar leh a vela mipui himna tura hmalakna atana tih niin hetianga mi inphal an awm chu lawmawm an tih thu Serchhip Kawnpui South Branch YMA hruaitute chuan an sawi.

Serchhip-a Cricket Game ngainatute chu nimin khan inhmukhawmin ‘Cricket Association of Serchhip District’ an din.

Mizoram Excise & Narcotics Department-a Joint Commissioner, Vanlalmalsawmdawng-liana chuan nimin khan Serchhip rawn tlawhin Annual Inspection a nei.

Nimin khan Serchhip-ah District Consultative Committee (DCC)/District Level Review Committee (DLRC) & District Level Security (DLSC) Meeting chu District Bawrhsap, Sangchhin Chinzah hovin neih a ni a, Serchhip District chhunga Bank hrang hrangte hmalak dan thlirho a ni.

ZPM |halaite chuan Central Jail tihchangtlunna Project-ah sum hman diklohna lian tak a awm nia a lan thu sawiin, hemi chungchangah hian Mizoram sawrkar-a Minister ni mek, R. Lalzirliana leh Robert Romawia Royte te chu insawifiah tura an phut thu an sawi.

MNF Party General Hqrs. hruaitu thlanna neih turah Official Nominate te chu chuhtu awm lovin tling-ah puan an ni.

Serchhip Kawnpui South Branch YMA te chuan kan hma lawka Krismas leh Kumthar lo thleng tur pualin Serchhip khawpui lunlai, Bazar chu cheimawi leh tumin nizan hmasa atang khan hnatlang an nei tan a, kumdanga an tih thin ang lo deuhin, heng hunpui a liam hnuah pawh kan khawtlang chei zuitu ni thei tura chei an tum thu an Branch YMA hruaitute chuan an sawi.

UD&PA Department changtu Deputy Chief Minister, Tawnluia chuan nimin khan cheng nuai 2268.43 senga sak, Kolasib Sports Complex, Project Veng, Kolasib ami chu a hawng.

National Tobacco Control Programme (NT-CP) Serchhip District leh District Mental Health Programme te chuan nimin khan Presbyterian English School, New Serchhip-ah nimin khan zuk leh hmuam thatlohna leh naupang ten rilru hrisel an neih theihna tura inzirtirna hun an buat-saih a, he hunah hian zirlai naupangte chuan an puitlin hnuah pawh zuk leh hmuam ti lo turin thu an tiam nghal bawk.

Serchhip District Magistrate, Sangchhin Chin-zah chuan halpuah leh halmawi chi hrang hrang bakah naupang Silai lem chungchangah khapna thupek a tichhuak.