Latest News

MZP te Zofate Chawlhbuk sak tumin Bairabi-ah an kal; Buaina chhuak ah mi 10 velin hliam an tuar

MZP ten nimin-a Bairabi Zophai hmuna Zofate Chawlhbuk sak an tum chu Assam Police ten an phal loh avangin buaina a chhuak a, Assam Police ten tianga mipui pungkhawm an vuakna ah Mizoram mi 10 vel an hliam a, hliam zingah hian Mizoram-a chanchinbumi 2 an tel.

MZP General Hqrs. in ruahmanna an lo siam tawh angin nimin khan MZP Member \hahnem tak chu Mizoram Chief Minister hlui, Ch. Chhunga (L) Leilet-a Zofate Chawlhbuk sak an tumna ah Zofate Chawlhbuk hi sak tumin an thawkchhuak leh a. Helai hmun an thlen hian Assam Police \hahnem tak chu an lo awm tawh a, Chawhma dar 11:30 velah Assam Police te hian Chawlhbuk sak tuma pungkhawm, MZP member te hi tiang in an vua a, chanchinbumi hliam tuarte hi The Aizawl Post News Editor, Zohmingmawia leh Kolasib Duhlai Editor R. Lalnunmawia te an ni a, Kolasib Zing\ian Editor, Zomuanpuia Bike pawh vuak chhiat nual a ni a, MZP member lamah mi 7 an hliam a, Bairabi khaw mi pakhat a hliam bawk. Hliam tuarte hi Bairabi Damdawi In-ah First Aid pek an nih hnuah ngaihtuahawm lutuk an awm loh avangin chhuah tir leh vek an ni.
MZP Sub-Hqrs. Bairabi hruaitute sawi danin, Bairabi Zophai hmun a sak, Assam Police ten an \hiah tak Zofate Chawlhbuk sa \ha turin niminpiah khan MZP General Headquarters, Assistant General Secretary (AGS) H. Lalthianghlima hovin MZP hruaitu \henkhatte chuan Bairabi an thleng a, Bairabi MZP te nen nimin zing khawvar tirh a Zofate Chawlhbuk sakna tur hmanrua dah tur leh a bul lo \an tura Chawlhbuk sakna tur hmun an thlen chuan Assam Police \hahnem tak an thuam famkim nen an lo awm tawh a. Assam Police te hian Chawlhbuk sakna tur hmanrua motor a phurh chu hlan thlak an phallo a. Assam Police hotute leh Magistrate te hian MZP hruaitute hnenah hian Chawlhbuk sak an tumna hmun chu MZP ram a ni ngei tih fiahna tur an dil ni a thudawn niin, MZP te ram ngei a ni tih fiahna LSC/pass hi an neih thu an sawi thung a ni.
Hemi hnu hian Assam Police leh zirlaite hi inep zui zelin Assam Police te hian tiang an lek zui a. Assam Police ten tiang an chelek hnu hian Chawlhbuk sakna tur hmunah hian Assam Police-te awmin, MZP-te chu a piah deuhah an inkulh thung a. Helai hmunah hian Mizoram lam a\angin Magistrate leh Police kal an awm lo nia hriat a ni.
MZP President, L. Ramdinliana Renthlei chuan Mizoram leh Assam sawrkarin inremna an siam hma chuan Zophai-ah hian awmchilh an tum tih a sawi a, Assam Magistrate-te'n Assam sawrkar in in biak an duh thu Mizoram Chief Secretary hnenah Nilaini khan an thawn thu an hrilh tih sawiin, "Mizoram sawrkar lamin engtin mah an chhang let lo a, hei hi Assam sawrkar lam thinrinmna chhan pakhat pawh a ni," a ti a. Assam sawrkar-in a ram chhanna atan a Police-te a hman laiin, Mizoram sawrkarin Police pakhat a tir lo chu mak an tih thu a sawi bawk.
Hetihlai hian Home Minister, R. Lalzir-liana chuan helai hmun hi Assam leh Mizoram inrina, ramri buai lai a nih avangin Mizoram leh Assam lamin kutthlak lohna tura dah a ni tih a sawi a, heti chunga helai hmuna eng thil emaw lo tih hi a rem loh bakah hei hian ramri buai chinfel kawngah kawngro a su lova, chuvangin MZP hruaitute pawh helai hmuna Zofa Chawlhbuk sak leh an tum chu ti tawh lo turin a lo ngen tawh niin a sawi a. Bairabi VC leh tlawmngai pawlte pawhin MZP te chu helai hmunah hian engmah ti lo turin an ngen tih a sawi bawk.
Thudawn danin helai ramri-ah hian tun hmalam pawh khan buaina a awm zeuh zeuh avangin kum 2013 leh kum 2015 inkara Kolasib Bawrhsap hna chelhtu, Jitender Yadav leh khatih laia Hailakandi District Bawrhsap te chuan sawrkar aiawha thutlukna siamin ramri buai chinfel a nih hma chuan helai hmunah hian khawi lam lam mahin kutthlak loh ni se tiin thu an lo dah tawh a ni.

Comments

Popular News (Last 30 Days)