Latest News

Village Council Conference cum Panchayat Sammelan Serchhip-a neih dan tur chungchang sawiho a ni

Serchhip District Bawrhsap, Sangchhin Chinzah hovin thla thar December 12 leh 13-a Village Council Conference cum Panchayat Sammelan neih dan tur chungchang ngaihtuahin nimin khan Meeting neih a ni.
He Meeting Bawrhsap Pisa-a neih ah hian DC, Sangchhin Chinzah chuan Village Council Conference neih tur hi State Institute of Rural Development & Panchayati Raj (SIRD & PR) a\anga ruahmana lo kal anih thu sawiin, December ni 12 leh 13, 2017 chhungin he Samelan hi hman tur a nih thu a sawi a. He Samelan-ah hian Serchhip District chhunga Village Council tin ten an huamchhung \heuha khawtlang tana hmasawnna hna an thawh te leh mipui an kaihhruai dan te phochhuahna hun tur a nih thu leh hetiang hun buatsaih thei tur a ni chu a lawmawm hle a ni, a ti a. Village Council ten ram leh khawtlang tana hma an lak zel dan turte leh ruahmanna \ha zawk an neih theihna tur atana inrawnkhawmna hun \ha tak anih tur thu a sawi bawk.
He Conference hi Serchhip DC’s Conference Hall-ah neih tura ruahman niin; ni hnih (2) chhung a awh anga, a nikhatna ah hian khuallian atan bialtu MLA leh Mizoram Chief Minister, Lal Thanhawla chu beisei niin, khualzahawm atan Hrangturzo bialtu MLA, Vanlalawmpuii Chawngthu, Minister of State chu beisei a ni bawk. He hunah hian SIRD a\anga mithiam lo kal ten thupui thlan bik- VC leh Panchayati Raj Institutions khaikhinna, Swachh Bharat Mission (SBM) leh Human Rights hmangin zirtirna an pe anga, a ni hnihna ah District Local Administration Officer (DLAO) kaihhruaina hnuaiah District chhunga Village Council hmalakna hrang hrang- mipui rorelna te, faina kawnga hmalak dan leh hmasawnna kawnga hma an lak dante ngaihthlak a ni anga, VC ten an duhzawng sawiin rorelna hun an hmang dawn bawk a ni.
He Conference neih chhung hian Village Council tinin kum kaltaa an hnathawhte mipui hmuh theih turin thlalak an phochhuak anga, chung zing a\ang chuan a ti \hate thlangchhuakin lawmman pakhatna a\anga pathumnan thleng pek an ni dawn bawk a ni. Nimin a \hutkhawm ah hian hian Addl. DC, Chuauhnuna; DRDA Project Director, VL. Remliana; SDO (Sadar) R. Vanrengpuia; DLAO Beitlotha Nohro leh Serchhip leh East Lungdar BDO bakah District Urban Development Oficer te pawh an tel a ni.

Comments

Popular News (Last 30 Days)