Mizoram State Boxing Championship vawi 39-na zawhfel niin Serchhip District an champion

Mizoram State Boxing Championship vawi 39-na chu Zirtawpni tlai khan Serchhip Boxing Hall-ah zawhfel a ni a. He Championship kharna hun hi Chief Minister, Lal Thanhawla chuan a hmanpui a ni.
He Championship kharna hunah hian Chief Minister chuan Mizote chu Sports discipline hrang hrangah kan \ha tih sawiin, contact sports-ah phei chuan kan \hat zia a lang chho mek tih a sawi a, tunhnai lawkah Tuipui Tlangval Laldinmawia, World Champion te kan nei chu lawmawm a tih thu sawiin, Mizo hming ti\hatu hi chhuanawm a tih thu leh a lawmpui thu a sawi a. Mizoram pumah Sports potential lian tak a awm tih sawiin, "Hei hi India sorkar pawhin a hrechiang a. Hmarchhak bial, a bikin Mizoram hi an rawn en uluk tawh hle a ni," a ti a. Ram hmasawnna teh nan khawvelin sports chu a hman pawimawh tak a nih avangin India pawhin a ngai pawimawh tih sawiin, Sports kaltlanga hlawhtlinna nei tur leh international level thleng tur chuan chhunglam leh pawnlam in uluk a pawimawh tih a sawi a. A pawimawh ber hriselna nei turin in uluk a, inthunun theih leh Coach leh Administrator-te thuawih a ngai a ti a. Sports Administrator-te, Coach leh zirtirna petu te pawh an nun in uluk tur leh engkima infiammite entawn tlak ni turin a chah a ni.
Chief Minister, Lal Thanhawla chuan khelmual leh infiamna hmun hrang hranga sak mek te sawiin, Contractor-te hna muangchang chu \halo a tih thu leh sorkar pawhin a nawr hmanhmawh reng thu a sawi a. Serchhip a Football Stadium sak mek chu sak zawh a nih thuai theih nan theihtawp chhuah mek a nih thu leh Aizawl khawpui a Hockey Ground siam tum a nih thu te a tarlang a, SEDBA hnenah \anpuina sumfai Rs.35,000/- an chhungkaw pualin a hlan bawk.
Mizoram State Boxing Championship kharna hunah hian Mizoram Boxing Association (MIZBA) President, Dr. Zorammawia; AIBA Joint Secretary Dr. Lalrozama leh ROC Chairman, Lalnunmawia te pawhin thu an sawi a ni.
Ni 4 chhung awh he Boxing Championship-ah hian Boxer 136 te telin Weight Category 41-ah inelna an nei a, bout 95 a awm a, a pumpui ah Serchhip District chuan Medal 59 lain pakhatna an ni a, Serchhip District a\anga tel te hian Gold Medal 15 lain Silver Medal 22 leh Bronze Medal 22 an la a, Sub-Junior leh Senior-ah che\hain, Gold Medal 11 ngawt lain Silver Medal 17 leh Bronze Medal 18 lain a pumpui ah medal 46 zet an la a, Senior-ah Gold, Silver leh Bronze 4 \heuh a vaiin Medal 12 an la bawk. Mipa-ah Malsawmtluanga, Serchhip chu Best Boxer-ah thlan niin Hmeichhe lamah Lalrohlui, Aizawl chu Best Boxer a ni bawk a, LH. Beineisa, Siaha District chu mipa ah Most Promising Boxer niin hmeichhe lamah Lalrinngheti, Serchhip chu Most Promising Boxer atan thlan a ni bawk.

Popular News

Mizoram-ah Faina Hapta hman \an leh a ni

Retailer bukna diklo 3 man