Latest News

Khawkhawm kum 50-na leh Haw Runpui hmang

Chhiahthlang-ah nimin khan Khawkhawm kum 50 tlin lawmna leh hemi paula ‘Haw Runpui’ chu neih a ni a, he hun hi Chief Minister, Lal Thanhawla chuan khuallian niin a hmanpui a ni.
Govt. Chhiahtlang M/S Tual-a he hun hmanna ah hian Chief Minister chuan \hangthar te thudik hriattir chu kawngdik kawhhmuhna leh muanna hlutzia kawhhmuhna hun remchang a ni tih sawiin, "Kum 1967 January ni 3 a\anga in\anin Mizoram chhunga khaw za zela khaw sawmriat zet chu khaw 102-ah hreawm takin sawihkhawm a ni a. Protected & Progressive Village tih hming puttir a ni nachungin Sawikhawm khawchhunga tawrhna nasa tak leh a hming mawi tak chu a inmil thei lova, a chhan chu a chhungah Kohhran leh khawtlang nun a zalen lova, huan leh lo a siam theih loh avang te, eng hna mah a thawh theih loh avangin ei leh bar a harsa a, nunau an him lo a, mipa tawh phawt chu rinhlelh an ni vek a. Kum 1972-ah Gauhati High Court in Dan palzutna nasa tak a awm tih hria in a titawp," a ti a.
Rambuai vanga kum 20 chhungzet \ah leh ha\hialna kha thil hriatthar leh fo chakawm leh hriatchhuah nuamlo tak ni mahse \hang leh thar ten chiang taka an hriat a, an pi leh pute tawrhna a\anga remna leh muanna a hlutzia te an hriat nan hmang se a duh a tih Chief Minister chuan a sawi a. "Kum 20 chhung Rambuai vangin hmasawnna a awm thei lo a; midang te aiin Mizoram pawh nasa takin hnufum phah a ni," a ti a. Polictics chu mihringte hnenah inrelbawlna leh hma an sawnna atana Pathian in a pek a ni tih sawiin, “Hman sual a thiang lova, mahni leh chhungkhat lainate sahmim ip tihpuarna atan hman chi a ni lo,” a ti bawk.
Chhiahtlang khawkhawm hriatrengna hun hi Organising Committee Chairman, Lalremliana chuan a kaihruai a. He hunah hian Rambuai leh tun inkara famchang ta te sunna hun hmangin Khawkhawm hun laia tawrhna te chu hlachham leh lemchan inchawhpawlh a entir a ni. He hun puala Souvenir buatsaih chu Dr. H. Lalthlangliana, Organising Committee Adviser in a tlangzarh a.Organising Committee Adviser, R. Chhungthana'n he hun puala a inpuahchahna a ziah chu chhiar chhuahna hun hmangin Chhiahtlang VCP, CR .Dothanga'n Chhiahtlang danglam bikna a tarlang a ni. Chhiahtlang VCP chuan Chhiahtlang khua chu Gravity hmanga vantlang tui in tur la haw hmasa ber pawl an ni sawiin, Khawfai ber nihna te pawh lo hauh tawh \hin in kum 50 chhung zet Chhiahtlang khuaah hian Tualthahna a thleng tawhlo tih a sawi bawk.
Khawkhawm kum 50-na leh Haw Runpui hi ni hnih (2) hman tura ruahman a ni a, Vawiin hian a hmun ngaiah Bialtu MLA, Er. Larinawma hovin ruai nen hman leh tura ruahman a ni a, nizan hmasa khan hemi puala Meidet neiin nimin zing khan lirthei hmanga kawngzawh an nei bawk.

Comments

Popular News (Last 30 Days)