Latest News

Darnam YMA kum 25-na lawm

Serchhip Darnam Branch YMA Kum 25 tlin lawmna chu ni thum chhung neih a nih hnuah nimin khan ruai nen Jubilee lawmna hi neiin zawhfel a ni.
Serchhip Darnam Branch YMA kum 25 tlin lawmna, LM Middle School tual-a neih hi an Branch YMA President, T. Lalthlan-awma chuan kaihruaiin he hunah hian Serchhip Darnam Branch YMA din dawn laia Serchhip YMA President, Vanlalchhunga chu Khuallian-ah hman a ni a. Khuallian chuan Serchhip Darnam Branch YMA lo indin chhoh dan te sawiin, tuna hetiang dinhmun an thleng thei ta chu a lawmpui thu a sawi a. Tunlai \halai zingah hnathawk peihlo leh mamawh ngah, nun thup-a Kohhran-a inhmang chunga ruihhlo ti reng an awm \hin chu a ngaihmawh thu sawiin, \halaite chu an theih anga nu leh pa \anpui tur leh an phak tawka thawh-chhuah nei turin a chah bawk.
He hunah hian Serchhip Sub-Hqrs. YMA aiawhin Asst. Secretary, PC. Vanlalluna pawhin thu sawiin YMA Member ten aia upa te zahna kawngah \an an lak zel a pawimawh thu a sawi a, ruihhlo dona kawngah YMA in theihtawp chhuaha hma a lakna te \awiawm tura sawmin, mipui ten dikna leh rinawmna kan neih zel a pawimawh thu a sawi bawk.
Darnam Branch YMA Silver Jubilee lawmna hunah hian an Branch YMA din tirh a\anga an Member boral mi 141 te sunna hun hman a ni a, an din tirh a\anga Branch YMA kaihhruai hna lo thawk tawh zawng zawngte hnenah chawimawina hlanin an huamchhunga In leh a vel vawngfai ber, C. Lalbiakthanga te hnenah chawi-mawina an hlan bawk.
Darnam Branch YMA hi July 6, 1992 khan Section YMA in an ding a, January 4, 1993-ah Dinthar Branch YMA a\anga indangin Branch YMA hi an ding \an a, tunah hian member mipa 109 leh Hmeichhia 183, an vaiin member 292 an awm mek a, an huamchhung ah hian chhung-kua 203 an awm mek a ni.

Comments

Popular News (Last 30 Days)