Buh chin turah a hlawk aia a tui la thlang an tam avangin Zawlpui-a buh thar a pung hleithei lo

Mizoram Journalists Association (MJA) Serchhip District Member te chuan Zirtawpni kalta khan Serchhip Zawlpui phai-a Agriculture Department hmalakna hrang hrang an tlawh a. Agriculture Department-a thawk te chuan Leilet neitu ten an Buh chin ah hralhchhuah tura hlawk chi aia a tui ringawt an la ching duh chu buaithlak an tih thu an sawi.

Zawlpui phai tlawhtu Serchhip MJA Member te hi Serchhip DAO Office-a AEO, K. Laltlanmawia chuan lo dawngsawngin an hmalakna hrang hrangte a hmuna enpuiin a hrilhfiah a, K.Laltlanmawia chuan Agriculture Department-in an tum ber chu leilet siamna ram te \angkai zawka hmanga kum khata vawi hnih tal thlai tharna atana hman chu a nih thu leh chumi atan chuan an hmanraw neih te hman \angkai tum a nih thu a sawi a, tunah hian Zawlpui leilet-ah mimalin buh an ching mek a, hemi rual hian Agriculture Department pawhin buh chi hrang hrang enchhinna turin mimal leilet engemaw zat an hmang hawh mek bawk a, heng an Buh enchhin zingah hian a thar hma leh tui deuh te, buh tui tak ni lemlo thar hlawk thung leh natna leh rannung in an beih vakloh buh te a ni hlawm a. Tuna an buh chin mek te hi an seng veleh loneitute chu Thlasik thlai chin chhunzawm tir nghal an tum tih a sawi a, hemi rual hian Agriculture Department chuan Thlasik thlai engemaw zat enchhinna turin an ching ve nghal dawn tih a sawi a. Nikum lamah Nihawichi chu enchhin ni tawhin an beisei aia \ha a nih laiin a seng hun hmain lo hal sak an awm avanga tharchhuah erawh an neih takloh thu sawiin, kumin hian Chana, Bean \hu, Tel-an leh Purunsen chin tir an tum thu a sawi a. Kumin hian ruahtui tla a tam avangin buh chingtute tan harsatna a thlen tih sawiin, Department in an enchhin \henkhat ah pawh beisei ang thar phaklo tur te a awm thu a sawi bawk.
K.Laltlanmawia chuan leilet neitu leh enkawltu ten an buh thar hralhchhuah lam ngaihtuah lova anmahni tui tih zawng leh an khamkhawp thar tur chauha buh chin an uar tlat chu \halo a tih thu a sawi a, tunah hian Tripura a\anga buh chi an lak, a thar hlawk chi chu enchhin mek a nih thu leh Zawlpui-ah Rice Mill din tum a nih thu sawiin, hetianga hma an lak hunah chuan leilet neitute pawhin buh hralh chhuah tam lam ngaihtuaha buh thar hlawk chi chin an uar a rin thu a sawi a. Tunhma lam ngaihtuah chuan tunlai in Leilet siam a awlsam tawh tih pawh sawiin, Agriculture Department-in leilet neitu ten Tractor an hawh theihna tur, Custom Hiring Centre a siamsak thu pawh a sawi a. Custom Hiring Centre-a tractor an pek te chu Leilet neitu ten darkar khat ah Rs. 800/- vela an hman theih thu sawiin, a hma chuan darkar khatah cheng sangkhat chuang te a nih thu a sawi a, Serchhip Zawlpui phai-a hman tur hian Tractor pakhat pek leh tum a nih thu a sawi a. Leilet neitu ten an Leilet kum khata vawi thum thlawhfai \hin pawh tunah chuan kum khatah vawikhat chiah thlawhfai a ngai tawh tih a sawi a, Agriculture Department chhinchhiah dan chuan kum khata thla 3 daih tur chiah Mizoram-ah buh kan la thar chhuak tih a sawi bawk.
Serchhip Agriculture Department-a AEO hian RKVY hnuaia Zawlpui phai-a Tui-chhunchhuah an siam pawh MJA member te hi en puiin Tuichhunchhuah hi tam zawk siam leh tum a nih thu leh heng te hi Thlasik thlai chinna atan \angkai taka hman theih an beisei tih a sawi a, Mat lui luanna chu Phaizawl aia a hniam zawk avangin tui harsatna an tawh \hin thu leh hmun 8-ah lai Tuichhunchhuah hi an laih avang leh kawlphetha lakluh a nih tawh avangin a \angkai dawn hle tih a sawi bawk.
Hei bakah hian NEDP hnuaia Purunsen ching tura hma an lakna kal mek pawh tlawhpuiin, tunah hian Purunsen chi hi Nursery-ah kui\iah mek a ni a, tunhma lama Leilet neitu \henkhat ten an lo chin tawh \hin dan ang ni lova chin tum a nih thu a sawi a. PMKSY sum cheng sing kua senga Hmangaihthangi leilet-a Tuikhuah an siam mek pawh an tlawh nghal bawk a ni.

Popular News

Mizoram-ah Faina Hapta hman \an leh a ni

Retailer bukna diklo 3 man