Vaihlo nghai tumte pan turin Mizoram-ah Tabacco Cessation Clinic 10 hawn a ni tawh

Nimin khan Falkawn-a Referral Hospital-ah Vaihlo zuk leh hmuam nghei tum enkawlna tur, Tobacco Cessation Clinic chu Indian Society on Tobacco and Health, Mizoram Chapter President, Lal Riliani chuan a hawng.
Falkawn Referral Hospital-a Tabacco Cessation Clinic thar hawnna hunah hian Indian Society on Tobacco and Health, Mizoram Chapter President, Lal Riliani chuan sorkar ropui leh thil ti thei zawk, mifing zawk ten vaihlo chu ‘a hrisel lo a ni, mihring tana \halo a ni,’ tiin Drug chi khat ah ngaiin an do mek tih a sawi a. Hriselna lama khawvel huapa hma la tu, WHO pawhin a buaipui mek vaihlo chu kan ramah pawh nasa taka kan buaipui mek thu sawiin, a bik takin ramdang in an neih ve loh Tuibur thlengin kan ramah chuan buaipui a ngai tih a sawi a, thawh tur leh hmalakna tur a tam hle tih sawiin, Referral Hospital-a thawktu te chu vaihlo leh a kaihnawiha fihlim tur leh midang te zirtir chhawng zel tu ni tura a beisei thu a sawi bawk.
He hunah hian Dr. Jane Ralte, State Nodal Officer, National Tobacco Control Programme chuan tun dinhmunah Mizoram pumah Vaihlo leh a kaihnawih bansan tum te enkawlna hmun hi hmun 10-ah hawn a ni ta tih sawiin, heng te hi District tina Sorkar damdawi In te bakah Mizoram State Cancer Institute Zemabawk leh nimin a hawn tak State Referral Hospital, Falkawn te a nih thu a sawi a, heng Clinic 10 bakah hian Chhinga Veng Presbyterian Kohhran chuan Social Front nen \angkawpin Satellite Clinic an nei a, Clinic pangai in hawn loh Ni apiangin anni hian hma an lo la ve \hin a ni.
Mizoram-a Tabacco Cessation Clinic te hi June 2009 a\anga kumin August thleng khan Vaihlo leh a kaihnawih sim tum mi 16,401 in an pan tawh a. A pantu zat a\anga chhuta za zela 22.1 (22.1%) in Vaihlo leh a kaihnawih an sim a, Mizoram-a Tabacco Cessation Clinic hrang hrangte zingah Lunglei District-a Tabacco Cessation Clinic chu pantu an tam ber a, July 2009 a\anga kumin August thla thleng khan mi 4857 in Clinic hi an pan tawh a, a zinga 24% in Vaihlo an nghei a ni. Tabacco Cessation Clinic-ah te hian Vaihlo leh a kaihhnawih sim tum te tan Councelling, Nicotine Replacement Tharapy (NRT) leh Non NRT te an pek theih bakah taksa a vaihlo tur Nicotine awmzat en theihna hmanrua te dah a ni.

Popular News