Sum rul turin CM an phut

PRISM President, Vanlalruata chuan Dan kalha Parliamentary Secretary kan neih avanga mipui sum (public money) cheng vbc. 18.81 kan khawhral thlawn chu Mizoram Chief Minister Lal Thanhawla’n a rulh a ngai a ni, a ti.
Nimin khan Aizawl-a PRISM Office Conference Hall-ah Parliamentary Secretary leh anmahni avanga sum khawhral dan chhutna neih a ni a. PRISM thuchhuah in a tarlan danin Constitution kalha Dan phuahchawp siam, Mizoram Parliamentary Secretaries (Appointment, Salaries, Allowances and Miscellaneous Provisions) Act, 2009 hmanga Parliamentary Secretary 13 kan neih te enkawl nana Mizoram sorkarin mipui sum a khawhral thlawn chu an chhut theih chin chu Rs. 18,81,51,159/- a ni tih an tarlang a. Hetah hian a zat chhut mai a harsat avangin Parliamentary Secretary leh an Personal Secretary te Car leina leh repair & maintenance te, an zin veivahna senso te chhut tel a ni lo tih an tarlang a. Hei bakah hian limit nei lova an hman theih Telephone leh internet, electricity leh water bill te MLA hman theih chin anga chhut sak a nih thu an tarlang bawk.
Hetianga Dan kalha appointment inpek avanga mipui sum khawhral awm reng reng chu ‘Public Servant Personal Liability Act, 2010’ angin appointment petu in a rul tur a ni tih an thuchhuah ah chuan tarlangin, chuvang chuan he Parliamentary Secretary te enkawl nana sum khawhral zawng zawng hi Chief Minister Lal Thanhawla hian a rul ngei tur a ni, tiin PRISM President, Vanlalruata chuan a sawi bawk.

Popular News

Mizoram-ah Faina Hapta hman \an leh a ni

Retailer bukna diklo 3 man