Serchhip khua chu pawnler-a inthiar awmlohna, Open Defecation Free (ODF) Town-ah puan a ni ta

Serchhip District Sanitation Task Force chu nimin khan an Chairman, Sangchhin Chinzah, DC Serchhip hovin a Office Chamber-ah an \hukhawm a. He hunah hian Bawrhsap chuan Serchhip khawpui chu pawnlera inthiar awm lohna khawpui, Open Defecation Free (ODF) Town-ah a puang a ni.

Serchhip khawpui Open Defecation Free Town anih theih nan hian hun rei tak kalta atang khan hmalak a ni a, tun August thla tir lam khan Town chhunga Ward/Village hrang hrang ten an Veng \heuh chu ODF Village a nih thu Declaration an siam kim thei a. Chumi anih avang chuan August ni 22, 2017 khan District Sanitation Task Force chuan Temporary ODF-ah Serchhip chu puangin, sawisel duh neite tana sawiselna hun ni 15 chhung a hawng zui a. He hun hawn chhung hian ngaihtuah zui ngai tham sawiselna (Substantial Objection) a awm loh avangin nimin a \hukhawm chuan thutlukna siamin Serchhip chu ODF Town ah puangin, Chairman Pi Sangchhin Chinzah hian ODF Town a puanna hming a ziak nghal a ni. ODF a Serchhip an inpuanna hi State thuneitute hnenah thlen leh tur a ni a, State in Central thuneitute lamah thlen lehin ni 30 chhungin Third Party Verification Team an rawn tir leh dawn a ni.
Nimin a Serchhip District Sanitation Task Force \hutkhawm ah hian October 2-9, 2017 chhunga Cleanliness Week, 2017 lo thleng tur hman dan tur sawiho niin Cleanliness Week hi a hawnna inkhawm chu October ni 2, zing dar 7:00-ah Serchhip Bazar-ah neih a ni ang a, zing dar 6:00 ah Zirlai naupangten khawchhungah Cleanliness Rally neiin, dar 7:00 ah Bazar-ah Opening Function hmannaah an tel nghal ang. Week chhung hian Veng tinte chu Vengchhung tihfai hnatlang nei tura tih niin an thingpui in man pek an ni anga, Veng fai intihsiakna neih zui nghal a ni bawk ang. Lawmman chu October ni 9, 2017-a DC Conference Hall a Cleanliness Week kharna inkhawm ah pek an ni thung ang.
He \hukhawma tel te hian Mizoram-a District khawpui intihsiakna kal meka hmalak dan tur ruahmanna an lo siam tawhte bawhzui dan thlirletna an hmang bawk a, Village Council tinte hmalak dan hrang hrangte ngaihthlak a nih bakah NEDP Climate Change, Adaptation and Mitigation hnuaia Urban Stream tihfaina tur ruahmanna hmalak zui dan tur an rel bawk. He hmalakna hnuaiah hian khawpui thli luanna kawr pawimawh pahnih, Sesah lui leh Hmar Veng mawng-a Hmawngawn lui thenfai an rel a. A thawh hun tur chu a hrana la sawi leh tur a ni ang. He \hutkhawm ah sorkar mi pawimawh leh VC te an tel a ni.

Popular News

MZI ten thisen an pe

Mamit-ah ‘Free Coaching Class’ hawng

Roll ennawn a ni leh dawn

MUP ten kawng kam thianfai