MNF party huaihawtin Mizoram hmun hrang hrangah Martar Day urhsun takin hman a ni

MNF Party chuan nimin, Sept. 20, 2017 khan Mizoram hmun hrang hrangah Ram leh hnam tana nunna hlantute hriatrengna Ni, Martar Day an hmang a, Serchhip-ah pawh MNF East Block, Serchhip huaihawtin Martar Day hi hman a ni a. MNF General Hqrs. hruaitute pawhin hmun hrang hrangah an hmanpui a ni.

MNF East Block, Serchhip buatsaiha Martar Day hmanna ah hian chawhma dar 11:00-ah Serchhip Bazar-a Martar te Lungphun ah Ram tana nun hlantu Martar te hriatrengna hun hman niin he Ni hmanpui tura Aizawl a\anga rawn kal MNF Gen. Hqrs. Adviser, K. Liantlinga, Ex-MLA bakah MNF East Block Serchhip leh MNF Group hrang hrangte, MNF Unit hrang hrang leh MNF VC Member ten Martar te zahna Pangpar an dah a, hemi pual inkhawm tawi neih ah K. Liantlinga chuan thusawiin Mizo Nationalism tungding a, ram leh hnam tana nunna hlantute kan ramin a hre reng a ni, a ti a, Martar te thisen luanral chhan chu kan ram leh hnam in zalenna a neih theih nan a ni tih sawiin, ram leh hnam tana nunna hlantute avangin Mizote zalen takin kan la awm thei tih a sawi bawk.
MNF Gen. Hqrs. Adviser, K.Liantlinga chuan kan ram leh hnam dinchhuah nana an nunna hlu tak hlantute min hnuhchhiah chhunzawm turin nungdama la awm te hian mawhphurhna kan nei tih sawiin, khawvel ram hrang hrangah awm darh mah ila engtik Ni-ah emaw chuan Pathian kaihhruaina in zalenna hi kan la nei ngei ang tih sawiin, Martar te sulhnu kan zui a pawimawh thu a sawi bawk.
K. Liantlinga chuan Party politics a awm thu leh Sum leh pai vanga politics khel leh thuneihna duh vanga politics khel an awm bawk thu sawiin, chungte chu MNF chuan an ti ve tur a ni lo tih a sawi a, MNF chuan ram leh hnam politics an khel a, chu chu Mizo Nationalism a nih thu a sawi a, Party dang Congress leh ZNP ten ram leh hnam damna an keng tello tih sawiin, MNF chauhin ram leh hnam politics tak tak a ken thu leh MNF chuan Mizo Nationalism tun nun nan an khelh thu a sawi bawk.
Ram changkangte chuan an ram tana Martar te an zahin an ngaisang a, an chawimawi \hin tih sawiin K. Liantlinga chuan, “Keini pawhin kan ram leh hnam tana Martar te hi kan zah a, an thu-rochhiah chhunzawm tura ken kan pen a pawi-mawh a ni,” a ti a, tumruhna, huaisenna, dikna leh rinawmna nen Martar te sulhnu chhui a, an hmabak te tihlawhtling tura theihtawp chhuah turin he huna kalkhawm mipuite chu a sawm bawk a ni.
MNF East Block Serchhip hruaitute hian Martar Day pual hian nimin zing khan JN Hospital, Serchhip-a damlote kanin an chawhmeh tur Artui an sem bawk a ni.
Martar Day hi MNF President, Zoram-thanga chuan Lunglei-ah hmanpuiin, Zoram tana Martar-te zahna leh chawimawina chibai a buk tih a sawi a, "Martar-te'n a man an pek hlut zawng hi chhutchhuah theih rual loh khawpa hlu a ni a, an thisena a man an pek sa he Zoram tan Zofate hian a man kan pek ve a ngai a ni. Martar-te hniakhnung zui turin kan za-in i inhlan thar ang u," a ti.
MNF President chuan Congress sorkar in Ram leh hnam leh Pathian meuh pawi an sawi avangin 2018 inthlanah an tla dawn tih a sawi a. "Kum 10 an sorkar hnu, 1998 inthlan dawna Zoram mipuiin Congress an nin let khan tunah hian mipuiin an ning tawh zawk. Kha inthlanah khan MNF leh MPC-in seat 34 an la tih kan hriat kha. Kan hunlai let 6-in pawisa an ngah zawk chungin Congress sorkar-ah hian hmasawnna hmuh tur a awm lo a. Mahni mimal inhaivur chiah an ngaihtuah a ni," a ti bawk.
Aizawl-ah chuan MNF Sr. Vice President, Tawnluia hovin Martar Day hi hman a ni a, MNF Vice President, Dr. R. Lalthangliana’n Hnahthial-ah leh Treasurer, Vanlalzawma’n Kang-hmun-ah te an hmanpui bawk a ni.

Popular News