DoNER Minister hovin Aizawl-ah Water, Sanitation and Hygiene (WASH) Workshop neih a ni

Union Minister of State for Development of North Eastern Region (DoNER) Minister Dr. Jitendra Singh hovin nimin khan New Secretariat Conference Hall-ah Water, Sanitation and Hygiene (WASH) Workshop neih a ni.
Water, Sanitation and Hygiene (WASH) Workshop-ah hian DoNER Minister chuan sorkar laipui hmalakna in rampumah faina beihpui thlak mek a nih thu leh a hlawhtlinna tur chuan India rama mi chengten beihpui thlak hunchhung chauh ni lova, fai hi nunphung ve renga an neih a \ul thu a sawi a. State dangte nena khaikhinin Mizoram chuan faina kawngah hma a sawn chak hle tih sawiin, Pawnler-a inthiar awm tawhlohna Open Defecation Free State-a puan theih turin chak takin hma a la mek tih hriain hmun dangte tan pawha entawntlak khawpa State fai neih tum turin Mizoram mipuite a chah a. Faina leh thianghlimna hian mahni leh chenna hmun tihfai mai bakah rilru leh ngaihtuahna thianghlim thlengin a keng tel a ni, a ti.
He huna khual zahawm Health Minister, Lal Thanzara chuan Mizoram chu fai leh thianghlimna kawngah nasa takin a \hang tih sawiin, kum 2006 leh 2014 inkarah ringawt hriselna leh faina kawnga hmasawnna avangin Mizoramah naupang cher lutuk (underweight) za zelah panga in an tlahniam hman a, naupang \hang theilo (stunting) rate pawh za zelah 92 zetin a tlahniam tih a sawi a. Fai leh thianghlimna kawnga Mizoramin chak zawka hma a sawn theih nan mitinte an pawimawh a, zirlai naupangte a\angin zirtirtu, nu leh pa te, khawtlang hruaitute leh sorkar thawhho leh \anrualna a pawimawh hle a ni, a ti bawk. 
Mizoram Chief Secretary, Lalmalsawma kaihhruai WASH Workshop-ah hian Department pali- Urban Development & Poverty Alleviation (UD&PA), Public Health Engineering (PHE), School Education leh Health Department aiawhten faina beihpui Swachh Bharat an kalpui dan leh an hmalakna tlangpui an tarlang a. Mizoram hian Faina Hapta hi kum 1977 a\ang khan a lo hmang \an tawh a, kumin hi a kum 40-na niin India rama state fai ber nih tumin \an a la mek a. Kum 2015-ah khan State khawpui fai thlanchhuah zingah pakuana niin 2017-18-ah khawpui 434 zingah 105-na a ni. Mizoram State-a khawpui 17-te ODF an ni tawh a, endikna hmachhawn tur khawpui panga an la awm a. UD&PA Department chuan Sanitation-a an thawh \hat avangin Skoch Award leh HUDCO Award pawh a lo dawng tawh nghe nghe a ni. 
Ministry of Human Resource Development-in Swachh Vidayala Puraskar a kalpuiah kum 2016-17 chhung khan Mizoram a\angin School 22-te chu School fai, Five star nihna pek an ni a, Champhai District a\angin School pakua zet he intihsiaknaa an tel theih avangin School tel thei tam ber dawttu an ni a, HRD Minister hnen a\angin Award an dawng a ni. 

Popular News