Chawngte-a MSU hruaitu \henkhat kutthlak duhloh lantirin Aizawl-ah kawng zawh a ni

Mizo Students Union (MSU) General Headquarters: Aizawl leh Aizawl City College Joint StudentsUnion (ACCJSU) te huaihawtin Chawngte-a Chakma ten Ram leilungfa, Mizote kut an thlak leh an sawisak duhlohna leh lungawihlohna lantirna kawngzawh nimin khan Aizawl-ah neih a ni.

Mizo Students’ Union (MSU) General Hqrs. in thuchhuah siama an tarlan danin September 26, 2017-a Chawngte Govt. Higher Secondary School Sport lai, Chakma \halai rualin tibuaia, Mizo zirlai naupangten Sport an neih pawh zo theilo a an awmlai a, Chawngte MSU hruaituten thil awmzia hriattum leh boruak \ha awmtheih nana hma an lakna ah Chakma \halai 200 rualin Chawngte MSU hruaitute, Vanlalropeka, HC. Vanlalzuia, David Lalkhawngaiha leh Francis Zothanpuia te dimna tel miahlo a kut an lo thlak demna leh lungawihlohna kawngzawh hi Vanapa Hall kawt a\angin Hunthar Veng tawntirh thleng neih a ni a. Thuneitu lamin a MSU leh ACCJSU hruaitute an ngen angin Chakma House thleng kallo in Hunthar Veng tawntirh thleng lungawilohna kawngzawh hi neih niin hetah hian inkhawm tawi neih zui nghal a ni.

Hunthar Veng tawntirh-a inkhawm ah hian MSU President, RB. Lalmalsawma chuan Chakma te chu an haw ringawt lo tih sawiin, suahsual rawngbawl zawng leh Mizote min bei zawnga an awm reng chuan kan enliam mai mai tawhlo ang, a ti a, Bangladesh a\anga Dan lo-a lo lut Chakma te hi an lo luhloh nana venpui turin Chamka, Mizoram-a kum 1950 hmalama lo awm tawh te thawhpui ah a sawm bawk. He hun kaihruaitu MSU General Secretary, Lalthanzuala chuan buaina leh tharum thawhtura pungkhawm an nihloh thu leh Chakma ten ram leilungfa zawkte kut an thlak duhlohna leh lungawilohna lantir tura pungkhawm an nih thu a sawi a, kawng an zawh hmaa Aizawl DC kaihruaina hnuaia Meeting an neihna a Police Officer pakhat in an naute an Control theihloh tur thu a sawi chu a lungchhiatthlak a tih thu sawiin, Ram leh Mipui venghim tur zawka ngaih ten an naute Control theihloh tur thu a sawi chu a hna a tlinlo ang ah a ngaihthu leh khatiang \awngkam hmang tawhlo tura a duhthu a sawi bawk.

Nimin a he kawngzawh a tel te hian Resolution pali (4) pass in pawi khawih a Mizo kutthlaktu Chakma te, Mizoram Sorkar in hremna na tak a pek an phut thu te, Chakma kut tuar Mizote, Chakma Autonomous District Council (CADC) in zangnadawmna cheng nuai khat \heuh a pek an phut thu leh zangnadawmna a pek hma chuan Chakma House, Aizawl-ah mikhual an thlen an remtih loh thu bakah Bangladesh a\anga Dan lova lo lut Chakma te, Mizoram Sorkar in zawng chhuakin Bangladesh ah thawn haw an phut thu te a tel a ni.