PRISM in Assembly bial 40 chuh vek tumin Mipui ah Zohnahthlak Candidate an zawng mek

PRISM chuan kum 2018 Mizoram Assembly inthlanpui ah mal din an tum thu leh Assembly bial 40 ah candidate 40 neih an tum thu an sawi a. Mipui huapzo sorkar siam anih theih nan mipuiah candidate tur an zawng mek tih an sawi bawk. 

Inrinni kalta khan Aizawl Press Club-ah PRISM President Vanlalruata leh a thawhpuite chuan thuthar thehdarhtute kawmin PRISM President chuan kum 10 chuang ram leh hnam tana siam\hat tur an rawt \hin te leh corruption a awm tawh loh nana an hmalakna in rah \ha chhuah mahse, sorkar apiang nawr tu ni lova sorkar siamtu an nih a \ul zawk tawh thu a sawi a. Assembly bial 40-ah candidate 40 neih an tum thu leh Party dang nena thawhhona engmah an la neih loh thu a sawi a. An candidate zawng zawng chu Zohnahthlak vek an nih dawn thu sawiin, Mipui huapzo sorkar tak tak neih an duh thu leh mipui ah candidate an zawn mek thu an sawi a. Mahni ropuina leh ham\hatna tur ni lova ram leh hnam dinchhuahna tura in candidate ngam te lo penchhuak tura an sawm thu an sawi bawk. Kristianna a \ha bik a ni tih lantira Pathian chawimawi tur te, Zohnahthlak te inpumkhatna tur te, hna neilo awmlohna tur te, ramri, sakhua leh hnam dikna leh chanvo humhim turte in an thawh dawn thu PRISM chuan an tarlang a. PRISM MLA Election Manifesto chu August 1, 2017 khan an tlangzarh tawh thu sawiin Vanlalruata chuan, hetah hian huaisen chungchuang taka hmalak a ngaih dawn thu a sawi a. Assam enkawl lai Innerline Reserved Forest laklet te, hmang \angkai si lova ram zau pui pui neite ram chhuhsak te, eiruk hmangte man leh an eiruk sa chhuhsak leh thil dang pawimawh tak tak a awm thu a tarlang bawk.

Eirukna laka fihlim ngei tur Minister leh MLA an duh tih sawiin PRISM President chuan an sorkara Minister leh MLA nih chakawm loh rawk khawpin Minister, MLA leh adangte hlawh leh facility tihtlem tum a nih thu a sawi a, kumtin an thil neih puanzar a nih dawn sawiin, MLA te'n an bial ah Office an neih dawn thu an sawi a. Ram hmangaihtu tan erawh chuan thil chakawm tak a nih tur thu a sawi bawk. PRISM chuan Unit hrang hrang neih chu mipuiin an duh lo nia an hriat thu leh neih an tum loh thu an sawi a. State chhunga an Branch 400 bawr vel pawh \hiah vek an tum thu sawiin, Congress leh BJP Constitution-ah pawh Unit hi a awm lo a, Mizoram-ah hian an uar mai mai niin a sawi bawk.