Fur Zikhlum leh Fur Tomato ching turin Serchhip atangin a tiak vailiam a ni

Missions for Integrated Development of Horticulture (MIDH) hnuaia Serchhip District Horticulture Department ten Serchhip District chhung khaw hrang hrang thlabika Fur Zikhlum leh Fur Tomato chin tur an kui\iah chu a chingtu tur loneitute hnena pek turin nimin zing khan Serchhip a\angin vailiam a ni.  

MIDH hnuaia Fur Zikhlum leh Fur Tomato kui\iah vailiamna hun, Serchhip DC Office tual-a neih ah hian District Bawrhsap, Sangchhin Chinzah chuan Zikhlum leh Tomato te chu Thlasik thlai an nih thu leh kum tluanin kan mamawh bawk si anih thu sawiin, Fur laia chin theih tura ruahman leh kum tluana kan mamawh zat thar tura theihtawp chhuah chu thil \ul tak a ni, a ti a. Horticulture Department ten District chhunga chhungkaw engemaw zat te chin tura hetianga a \iak an nei chu lawmawm a tih thu sawiin, hlawhtling taka an tharchhuah theih chuan ram tan hmasawnna rahbi hlu tak a tling dawn a ni, a ti a. Serchhip Horticulture thawktute thawhrimna chu fak tlak nia a hriat thu a sawi a ni.

He hun kaihruaitu Divisional Horticulture Officer (DHO), Margaret Vanlalzami chuan, sorkar laipuiin kum 2022 a loneitute sum lakluh a leta tihpun a tumna kal zelah he hmalakna hi kalpui a nih thu sawiin, Fur laia State pawn a\anga kan chawkluh nasat em em Zikhlum leh Tomato chu a chi \ha bik, ruahtui tam lai pawha damchhuak ngei tur chu Serchhip Horticulture Centre of Excellent ah kui\iah niin loneitute hnenah semchhuah \an a nih thu a sawi a. A chi man hi a to em avang leh a kim thei ang bera kui\iah ngei an duh avangin a chia sem lovin a \iakin an sem tak thu a sawi a. Serchhip District chhungah a chingtu tur hlawm ruk (cluster 6) Hualtu, Hmun\ha, N. Vanlaiphai, Serchhip, Baktawng leh Thenzawl-a chhungkaw thlanchhuah hnenah pek an nih tur thu a sawi a. Zikhlum hi chhungkaw 200 leh Tomato hi chhungkaw 100 ten an ching dawn tih a sawi bawk.

He hunah hian Horticulture Development Officer, Lucy Zaithangpuii chuan Technical Report pein Zikhlum hi Japan Variety, Ryozeki leh Tomato hi Arka Rakshak leh Arka Samrat a nih thu a sawi a, kumin bik atan Zikhlum \iak hi nuai 20 leh Tomato hi nuai 5 vel mamawh a nih laiin Horticulture Centre-ah hian \um khatah \iak nuai 4 vel chauh kui\iah theih a nih thu a sawi a, mahse a \iak hmasa te semchhuah rualin a thar kui leh nghal zel a nih tur thu sawiin, hei hian a hralhna lamah pawh a chingtute tan awlsamna a thlen theih zawk beisei a nih thu a sawi bawk.

Nimin zing-a Zikhlum leh Tomato \iak vailiamna hunah hian Bawrhsap hian Hualtu Cluster-a sem turte a vailiam a, heng te hi loneitute hnenah semchhuah zui nghal a ni bawk.