Latest News

Buhfai harsat loh nan hma la; Gas dinhmun tur la chianglo; Tuialhthei ah thlaphanna tur awmlo

Tunhnaia Mizoram-a ruah nasa tak sur in a nghawng, leimin avangin Serchhip-a buhfai phurhluh chungchangah harsatna a thleng mek a. Eirawngbawlna Gas pawh rawn phurh awm rih lovin tuialhthei lamah erawh harsatna a awmlo thung.
Tunhnaia Mizoram chhunga ruah nasa tak sur avangin Serchhip leh Aizawl inkar, National Highway-54 chu lirthei lian chi tan tlan tlang theih ala ni lo a, kar hmasa lam khan Tuirial leh Aizawl inkar a leimin leh kawng tlahniam te chu PWD lam ten a theih ang angin siam\ha mah se tunah hian Chhingchhip khawchhunga Bailey Bridge chu lirthei lian, rit phur tan zawh theihloh in ala awm mek a, hei vang hian Serchhip-a dah tur buhfai phur te pawhin Lei lehlamah an buhfai hi hlangthla in mihring hmanga thiarkai a ni a, hei hi Motor hmangin Serchhip rawn thlenpui leh tura ruahman a ni. Hetianga buhfai a khaihlak hlek avang hian mipuite hnena semchhuah tur buhfai pawh Retailer te hnenah quota chanve zela semchhuah niin khaw \henkhat erawh chu pek kim theih ala ni lo thung a, amaherawh chu mipuite tana harsatna lian a thlen lohna turin hmalak zui mek zel a ni tih thuneitute chuan an sawi a ni.
Hetihlai hian MIZOFED Serchhip Branch-a thawktute chuan tunhnaia leimin nasa tak a thlen hnuah eirawngbawlna Gas dawn an la neihloh thu sawiin, Mualkhang a\angin Gas phur rawn kal pawh a awmloh thu an sawi a. Hei vang hian eirawng-bawlna Gas semchhuah tur an neihloh thu sawiin, hetianga Gas an rawn pekchhuah loh chuan mipuite tan harsatna a thleng zui dawn nia an ngaih thu an sawi a. Eirawngbawlna Gas phur tan World Bank Road-a kalin Serchhip-ah rawn phurh thlen theih a nih thu an sawi bawk.
Serchhhip-a Petrol Pump awmchhun, PB. Lalzuithanga Filling Station, Serchhip IOC Veng chuan tunhnaia kawng chhia avang hian harsatna an la tawklo tih sawiin, Petrol leh Diesel pawh an ngah tawk rih tih an sawi a, Inrinni khan Tuialhthei an lakna a\anga Motor rawn chhuak pawh an neih thu sawiin, an Motor hi World Bank Road a\anga an kal tir avangin chhiatna dang a thleng leh a nih loh chuan mipuite tan harsatna a awm loh tur thu an sawi a ni.

Comments

Popular News (Last 30 Days)